Isaksen design ukiut 20-nngortorsiorpoq

Nunarsuarmi atisalioriaaseq ineriartortuaannartuummat Isaksen designimik piginnittoq Nickie Isaksen aperaarput, atisat ineriartortuartuunerat nunatsinni qanoq maluginiartarneraa:

- Nunaga Kalaallit Nunaat isumassarsiorfigiuaannarpara kisianni aamma nunarsuarmioqatit qanoq atisalersoriaaseqarnerat aamma naleqqussarfigisarpara, Isaksen designimik aallarniisoq piginnittorlu 48-nik ukiulik Nickie Isaksen oqarpoq.

Taanna oqaluttuarpoq, danskit designeriisa ukiup affakkaartumik isumassarsioqatigiinnerunissaq pillugu naapikkaangata isumassarsiortarluni, nunatsinnukartuartarporli aamma isumassarsianik nutaanik imminut immerniarluni:

- Nunatsinniikkaangama aamma isumassarsisaqaanga, ukiumummi arlaleriarlunga nunatsinnukartarpunga, isumassarsiat tamakkua inuit akornanni aammalu pinngortitamiit aallaaveqarnerusarput, soorunami aamma kulturikkut oqaluttuarisaanermiit soorlu atuakkatigut, ila amerlaqaat uannut isumassarsisitsisartut. Ilaanni imaassinnaasarpoq ullormi nuannersumi illoqarfimmiittsillunga imaluunniit pinngortitami pisuttuarusaarnermi isumassarseriasaartunga, Nickie Isaksen tulluusimaaqisoq nassuiaavoq.

Nunami allamiut aamma pisisarput

Taanna nassuiaavoq qarasaasiakkut nittartagaq aqqutigalugu nunarsuup sinneranut tunisaqartaqalutik soorlu Canadamut USA-mut, Østrigemut, Frankrigemut, Tysklandimullu.

- Malugisaqaara takornariat nunatsinneereersimariarlutik uagutsinnut atisarsisartut tapersersuilersartullu, nunaminnullu uteraangamik nittartagarput aqqutigalugu atisarsiffigisarpaatigut. Ilaannilu aamma qarasaasiakkut inuit naapittarfiitigut takusimariarluta pisiffigisarluta, Nickie Isaksen oqarpoq.

Taanna aperaarput ukiut 20-ni tullerni Isaksen design qanoq takorloorneraa:

- Isaksenip atisaliai suli ingerlakkusuppakka, tassa arnap nunarsuarmioqataasup muteerniusumik atisalersornera, atisalersoriaaserlu tassaassaaq atisanut muteerniusunut malinnaasoq kisianni aamma atisalersoriaatsimini inuiattut kinaassutsini ilaatikkaa, Nickie Isaksen KNR-mut oqarpoq.