Aalborgimi Kalaallit Illuutaat pisortartaalersoq
Jyllandip avannaani kalaallit, inuillu Kalaallit Nunaannut attuumassutillit allat, Kalaallit Aalborgimi Illuutaanni nutaamik pisortartaassapput.
Anna Lyngemi Aalborgimi Kalaallit Illuutaanni pisortatut aappaagu januaarip ulluisa aappaanni sulilissaaq.
Aalborgimi Kalaallit Illuutaat taama ilisimatitsivoq.
Anna Lynge Jyllandip avannaani ukiuni 21-ni najugaqarsimavoq, Kalaallit Illuutaanni illoqarfimmilu ilisimaneqarluarluni.
Aalborgimi Kalaallit Illuutaanni siulersuisuni 2019-imili siulittaasuuvoq, kalaallillu Jyllandip avannaani peqatigiiffiini ukiorpaalunngulersuni akuusimalluni.
AAMMA ATUARUK Kalaallit Aalborgimi Illuutaata pisortaa nunatsinnut uteqqilertoq
Anna Lynge, Aalborgip kommuniata akuulersitsiniarnermut ataatsimiititaliaani ukioq manna aamma siulittaasunngorpoq.
Pisortanngortussaq ilinniartitsinermi aamma misilittagaqarpoq, Danmarkimi VUC-mi ilinniartitsisarsimalluni, soorlu aamma Jyllandip avannaani Ranum Efterskolemi ilinniartitsisarsimasoq. Kalaallit amerlasuut Ranum Efterskolemi atuartuupput.
Aalborgimi Kalaallit Illuutaanni maannamut pisortap Bo Albrechtsenip, Kalaallit Nunaannut uterluni Ilulissani atorfinikkiartorluni aallarnissaata kingorna Anna Lynge Aalborgimi Kalaallit Illuutaanni pisortanngussaaq.
