Lesbosimi qimaasut 11.000-nit amerlanerusut suli inissaqartinneqanngitsut
Qimaasut Grækenlandimi qeqertat ilaanni Lesbosimi najugaqarfiat Moria nunguilluni ikuallareersorlu, qimaasut najugaqarfigigallagassaannut nuuttut 1200-nit amerlanerupput.
Toqqinik qimaasut najugarfianni allami Kara Tepemi nappaaqqittoqarsimavoq.
Qimaasulli 11.000-nit amerlanerusut suli inissaqartinneqanngillat.
Qimaasut najugaqarfimmut Kara Tepemut maannamut nuuttut akornanni 35-t coronavirusimik tunillanneqarsimasutut paasineqarput.
Taakku maanna mattusimatinneqartut, Grækenlandimi oqartussat nutaarsiassaqartitsivimmut ERT-mut ilisimatitsissutigaat.
AAMMA ATUARUK Grækerit ministeriunerat qimaasut ineqarfissaannik atuutiinnartussamik pilersitsinissamik neriorsuisoq
Qimaasut katillutik 5000-t Kara Tepemut nuunnissaat pilersaarutaavoq, amerlasuulli tassunga nuukkusunngillat. Politiinit tusarfiit ilaat atiminik ilisimatitserusunngitsoq nutaarsiassaqartitsivimmut Reutersimut taama oqarpoq.
Grækenlandimi oqartussat qimaasut Kara Tepemut nuukkusunnginnerannut naammagittarnerat killeqartoq, Grækenlandip qimaasunut ministeriata Notis Mitarakisip mianersoqqussutigaa.
- Ajunngisaarnerput attaveqaqatigiilluarnerpullu ulluni tulliuttuni attatiinnassavagut, nakuuserniartoqassappalli politiit tigusarinnittalissapput, Mitarakis oqarpoq.
