Kalaallit Nunaata silaa 2100-mi imaassaaq
Kalaallit Nunaata ilarujussuani aasaq manna aatsaat taama masannartigaaq, ukiualunnguit kingumut qiviarutta pinngortitami ikuallatsitsingaatsiartumik nuna paningaatsiarpoq. Silap pissusianik peqquteqartumik aatsaat taamak pisoqartigaaq, siunissamilu tamakku ikilinaviarnatik.
Gassinik silaannarmut kissatsitsiartortunik aniatitsinerulerneq silarlunnerulerneranut attuumassuteqartoq, Naalagaaffiit Peqatigiit silap pissusia pillugu ataatsimiittartoqatigiivisa nalunaarusianni nutaami oqaatigineqarpoq. Silallu allanngoraluttuinnarnera nunatsinnut qanoq sunniuteqassava? DMI-mi silap pissusianut ilisimasallip, Martin Olesenip, tamanna akisinnaavaa.
Aasaq – nuna ikuallajasoq
2100-mi aasap silaa ullumernit kiannerussaaq – sisamanillu kiannerussalluni. Ullun amerlanerusuni seqinnerluni atoruminarnerussaaq. Taamaattoqarpallu masannarpiassanani. Nuannerunarsinnaagarluartorli malitseqassaaq:
- Sialuup annertussusaa allanngussanngilaq, masannarneratami nalaani ulluni ikinnerni siallingaatsiartassaaq. Aasaaneranilu panernangaatsiartassalluni. Taamaammat nuna panernerulissaaq ikuallarujussuartoqarnissaalu aarlerinarnerulissalluni, Martin Olesen oqarpoq.
AAMMA ATUARUK Silap pissusia pillugu ataatsimiittartoqatigiit immat qaffassangatikkaat
Silallu allanngornera nunatsinnut iluaquteqarsinnaavoq:
- Kiannerulerpat Kalaallit Nunaata kujataani naatitsinissamut piffissaqarnerulissaaq. Imarlu kissarnerulissaaq, taamaammat aalisakkat allaneersut avannarpartissallutik, Martin Olesen oqarpoq.
Ukiaq – qimussertoqarnikinnerulerlunilu qamuteralattoqarnikinnerulissasoq
Ukiamilu susoqartassanersoq paasiniarutsigu masannarnerulissangatinneqarpoq – tamanna qaffangaatsiassaaq. Kiatsinneruppammi nittaannikillilluni masannarnerulissaaq. Ullut issisiorfiit ikinnerulissapput:
- Kalaallit Nunaanni silap allanngornissaa sivitsussaaq. Aputeqartarnera sivikinnerulissaaq masannarsinnaaneralu sivitsorluni. Qulit ataallugit issittarnera sivikinnerulissaaq. Tamanna qimussertartunut piniartunullu kingunerluuteqassaaq, Martin Olesen oqarpoq.
Nunarput silap pissusia pillugu isumaqatigiissummut ilanngutilersoq
Naalagaaffiit Peqatigiit silap pissusianut nalunaarusialiaat ippassaq saqqummerpoq, tamanna Pipaluk Lynge-Rasmussenip Naalakkersuisut IA-p qineqqusaarutaanik eqquutsitsillutik nunarput Parisimut isumaqatigiissummut ilanngutitileraat maanna uppernarsarpaa:
- Parisimut isumaqatigiissut Naalakkersuisunit atsiorneqarnissaa pilersaarutaavoq, tamannalu ilimanarsivoq, Pipaluk Lynge-Rasmussen oqarpoq.
AAMMA ATUARUK IA silap pissusaata allanngoriartornera pillugu qineqqusaaruteqartoq: Nunarput Parisimi isumaqatigiissummut ilanngussaaq
Parisimi isumaqatigiissut inatsisitigut pituttorsimasuuvoq, tassanilu gassinik silaannarmut kissatsitsiartortunik aniatitsinikinnerulernissaq siunertarineqarluni. Nunat katillugit 195-it isumaqatigiissummut ilaapput, siusinnerusumili Naalakkersuisuusut isumaqatigiissut nunap inoqqaavisa aningaasaqarnikkut ineriartorsinnaatitaaffiannik soqutiginninnginneranik isumaqarnerat pissutigalugu nunarput isumaqatigiissummut ullumikkut ilaanngilaq.
Parisimi isumaqatigiissut pillugu suli Siumut isumaqataannginnersoq paasiniarlugu KNR-imit paasiniaavugut. Doris Jensen ima oqaaseqarpoq:
- Siumut Parisimut isumaqatigiissummut akerliunngilaq, atsiortinnatali iluaqutaasinnaasut akornutaasinnaasullu misissorneqarluarnissaat kissaatigaarput. Nunatut aningaasarsiornitsinnut isumaqatigiissut unititsinnginnissaanik pingaaruteqarpoq.
