Naasut uumasullu assigiinngitsut 4.400-t missaat nungutaanissamut aarlerinartorsiortut
Pinngortitami ikuallannerit ukiuni kingullerni annertunerulerlutillu amerliartorsimaqaat.
Orpippassuit inunnit ikuallanneqartarnerat pissutaallutik pinngortitamut tamanna ajoqutaasarpoq. Atuagassiap Sciencep misissuinerata tamanna takutikkaa, Videnskab.dk allappoq.
Nunarsuaq tamakkerlugu naasut uumasullu assigiinngitsut 4.400-t missaat nungutaanissamut aarlerinartorsiorput, ikuallatsitsinerit ilaatigut pissutaallutik. Misissuinermi taama ilaatigut inerniliisoqarpoq.
AAMMA ATUARUK Amazonasimi kiattup orpippassuini orpiit piiarneqartut aatsaat taama amerlatigisut
Indonesiami orangutanginiit Afrikami løvinut nungutaanissamut aarlerinartorsiortunut 4.400-nut ilaapput.
Orpippassuit siorna 2019-imi aggustimit ukioq manna marsi ilanngullugu ikuallanneqartut 12,6 millionit hektariupput. Assersuusiussagutta Danmark 4,3 millioningajannik hektareqarpoq.
- Nunani tamalaani kiatsikkiartuinnarnera orpippassuit ikuallalersinnaanerannut pissutaaqataapput, panernersuaqarnerulersarnera pissutaalluni nuna orpippassuillu ikuallaleratarsinnaanerupput, pinngortitarlu taamaasilluni ajalusoorsinnaalluni, Aarhus Universitetimi professsori Jens-Christian Svenning Videnskab.dk-mut oqarpoq.
