Aaffarmi qimmeqaqqusaanngilluinnarpoq

Aavarfinni umimmanniarfinnilu qimmit nassarneqartarnerat inerteqqutaavoq, aamma meeqqat ukiukitsut aavaqataasussaanngillat, Aalisarnermut Piniarnermullu Naalakkersuisoqarfik taama ersaritsigisumik oqariartuuteqarluni tusagassiuutinut allappoq.

- Aalisarnermut Piniarnermullu Naalakkersuisoqarfimmi ilisimavarput aavartut ilaat qimmilisaarlutik aaffarmiittartut, angallatiniillu unioqqutitsisumik tuttunniartoqartartoq, meeqqallu ukiumikkut inuuttut tuttunniartarlutik, naalakkersuisut nittartakkaminni allapput.

Qimmit meeqqallu piniariarfimmiittussaanngillat

Tuttunniarnermi umimmanniarnermilu qimmit nassaqqusaanngillat.

Tamanna paragraf 14-imi, immikkoortup pingajuanni, takuneqarsinnaavoq qimminullu tamanut atuulluni.

Qimuttunik qimmeqarfiit ukiuunerani qimussit assartuutitut atuiffiusartut pinnagit. Piniarnermi pissutsit tamanut assigiittussaapput, qimmillu tuttunik umimmannillu arlalitsigut qimaatitsisinnaanerat naalakkersuisut erseqqissaassutigaat.

Meeqqat aqqaneq marluk inorlugit ukiullit sakkunik ulorianartunik soorlu, aallaasit assigisaallu tunniunneqaqqusaanngitsut inatsimmi allaqqasoq, naalakkersuisut nittartakkaminni allapput.

Tuttut Umimmaallu illersugaanerat piniagaanerallu pillugit Namminersorlutik Oqartussat nalunaarutaanni paragraf 14-imi, immikkoortoq siulleq aappaalu naapertorlugit assartuutit tuttunik umimmannillu malersuinermut ungoorinermullu atoqqusaanngillat.

Umiatsianut aamma atuuppoq.

Pisat tamarmik nalunaarutigineqartassapput

Uumasunik naalliutsitsinermik pinaveersaartitsineq siunertaralugu maleruaqqusaqartoq, naalakkersuisut allapput.

Piniarnermi aallaasit sakkortussusaat eqqortut atorlugit naleqquttumillu ungasissuseqarnermiit ingerlanneqassaaq, piniakkap sukkasuumik iluameersumillu toqunneqarnissaa siunertaralugu.

Tuttunik umimmannilluunniit pisaqarsimagaanni pisaqarsimanngikkaluaraanniluuniit kommunerisamut nalunaarutiginissaat aamma pisussaaffiusoq, Naalakkersuisut nittartakkaminni ilanngullugu eqqaasitsissutigaat.