Aappilattumi toqutsisoqartoq: Pasineqartoq tigusarineqarpoq
Nunaqarfimmi Aappilattumi inummik toqungasumik siumuisoqarsimasoq politiit arfininngornermi ullaakkut nalunaarfigineqarput.
Taama oqaluttuarpoq Kalaallit Nunaani politiini pigaartoq Mads Lynge.
- Politiit Aappilattumukartinneqarput, taakkualu toqutsisoqarsimasoq paasivaat.
Tassungalu atatillugu tigusarinnippugut tigusarineqartorlu eqqartuussivimmut sassartissavarput, Mads Lynge taama oqarpoq.
Politiit maanna paasissutissiissutigaat, toqutsisutut pasineqartoq ulluni 26-ni tigummigallagassanngortinneqartoq tassalu septemberip ulluisa qulingata tungaanut.
Immikkut ilisimasallit aggersarneqarput
Toqutsisoqarsimaneranut atatillugu politiit annertunerusunik oqaaseqarusunngillat, taamaattorli Mads Lyngep oqaluttuarisinnaavaa, toqutaasoq angutaammat taassumalu ilaqutai kalerrinneqareersimasut.
Taama pisoqartillugu, immikkut ilisimasalinnik Danmarkiminngaanit tikisisitsisoqartarpoq. Uanilu pisumi aamma taamaaliortoqassaaq, taakkuali sapaatit akunnerata tulliata aallartinnerani Aappilattumut tikinnissaat naatsorsuutigineqarpoq.
Kalaallit Nunaannili politiit oqarnerat naapertorlugu toqutsisoqarsimasoq qularutigineqanngilaq.
