Agathe Lyberth qinersiniartoq: Danmarkimi kalaallit naligiimmik pineqartariaqarput

Folketingimi ilaasortanngortitassatsinnik marlunnik novembarip aallaqqaataani qinersissaagut.

Folketingimut neriulluarlutik qineqqusaartut nunatsinneersut 15-iupput. Taakkuli tamaviaarput. Nunattami inuini qinersisinnaasut affaannaasa missaat Folketingimut qinersiartortarput. Folketingimut qinikkat nunatsinneersut aamma sulererpiartartunukua? Taakkulu sulererpiartarnersut, unatta inuini qinersisinnaasut ilisimavaat?

AAMMA ATUARUK Nunatsinniit Folketingimut sassartut

KNR qinersisinnaasut qinersiartorniarnersut Folketingimilu ilaasortani nunatsinneersut sulererpiartarnersut ilisimaneraat paasiniarlugu Nuummi inunnik apersuivoq. 

Assi © : KNR

Pipaluk Berthelsen: Assi: KNR

Folketingimut qinikkat nunatsinneersut sulerisarnersut nalunngiliuk?

- Asuki ilisimasaqarfigivallaanngilakka, malinnaavigivallaannginnakkit.

Novembarip aallaqqaataani qinersiartorniarpit?

- Asuki, immaqa. Massakkumut suli eqqarsaatiginikuunngilara.

Qineqqusaartut suut qineequsaarutigineraat malinnaaffigaagit?

- Naamik, malinnaaviginngilakka.

Sooruna?

- Asuki... immaqa tiguartiffigineq ajorakkit.

Assi © : KNR

Agathe Lyberth Boller: Assi: KNR

Folketingimut qinikkat nunatsinneersut sulerisarnersut nalunngiliuk?

- Sulerisarnersut nalunngilara. Kalaallit Nunaanninngaanniit uagut sinnerluta aallartitaasut nalunngilara.

Sorpiaat suliarisarneraat malinnaaffigaagit?

- Uanga immaqa malinnaaffiginerpaavakka Kalaallit Danmarkimi najugallit Folketingimit sullinneqartut.

- Aamma massakkut Facebookikkut malinnaaffigaakka Danmarkimi meeqqanik arsaarinnittarneq. Taamaammat tamakkuninnga suliallit nersortaqaakka, ilungersoqataammata nuannaarutigisorujussuuara, kalaallit sinnerluta imminnut pilliutigalutik nukitik atorlugit sulimmata.

Folketingimut ilaasortaatitaqarnerput pingaaruteqarpa?

- Ilaana pingaaruteqaqaaq, massakkut itinerusumik malinnaaffiginngikkaluarlugit tigulaarifiigiuaannarpakka malinnaallunga.

Qinersiartuleruit sammisaq aalajangersimasoq pillugu qinersiartorniarpit, imaluunniit partiimik aalajangersimasumik qinersiartussavit?

- Apeqqutaatinngilluinnarpara partii sorleq qinissanerlugu, malinnaaffigineranili pingaartippara suut sulissutiginiarneraat. Partiilersornianngilanga, sinnerluta ikiorneqarsinnaagutta pingaartinnerpaajuara.

Suna pingaartippiuk?

- Danmarkimi kalaallit immikkoortitaanata naligiimmik pineqarnissarput pingaartippara. Danmarkimiilluni malunnartorujussuusarami kalaallit qallunaanit naqisimaneqartut, uanga isinni.

Assi © : KNR

Larsine Mikaelsen: Assi: KNR

Folketingimut qinikkat nunatsinneersut sulerisarnersut nalunngiliuk?

- Malinnarujussuarneq ajorpunga, ilisimavarali nunarput pillugu suliniutit anguniarneqartartut.

Soorlu suut?

- Soorlu peqqinnissaqarfimmut inuiaqatigiinnullu tunngasinnaapput, naalagaaffeqatigiinnerullu iluani aaqqitassat arlaatigut aaqqinniarneqartartut qaqinneqartartullu ilaatigut tusaasarparput.

Folketingimi ilaasortaatitaatta sulinerat qanoq malinnaaffigitigaagit?

- Malinnaaffigerujussuanngilakka. Piffissaqaraangama isiginnaarsinnaasarpakka, amerlanertigulli malinnaavallaarneq ajorpunga piffissaqarneq ajorama.

Qinersiartuleruit sammisaq aalajangersimasoq pillugu qinersiartorniarpit, imaluunniit partiimik aalajangersimasumik qinersiartussavit?

- Malinnaaffigeqqaalaassavakkaa sunik qanorlu oqariartuuteqarnersut, kisianni qinigassannik piukkussaqarpunga.

Assi © : KNR

Kenni Rønde: Assi: KNR

Folketingimut qinikkat nunatsinnersut sulerisarnersut nalunngiliuk?

- Tamakkiisumiunngitsoq, qularutiginngilarali naalagaaffik ilaatigooriarlutik ataatsimeeqatigisaraat allaffissorlutillu.

Novembarip aallaqqaataani qinersiartussavit?

- Aap qinersiartussaanga.

Qinersiartuleruit sammisaq aalajangersimasoq pillugu qinersiartorniarpit, imaluunniit partiimik aalajangersimasumik qinersiartussavit?

- Naamik, kisianni qineqqusaarnerit TV-kkooraangata malinnaavigisarpakka, kinalu qinissanerlugu tassuuna isumaliutersuutigaara.

AAMMA ATUARUK Qinersisinnaasut affaat ataallugit Folketingimut qinersiartortartut

Arlaannik aalajangersimasumik kissaateqarpit?

- Peqqinnissaqarfimmut tunngasunik ajornartorsiuteqartoqartoq tusaavara, aamma akisussaaffik Danmarkimut utertinneqarnissaa kissaatigineqartoq. Taanna eqqarsaatigisinnaavara.

Qinersinissat pingaartippiuk?

- Aap, tassami folketingimut, Inatsisartunut kommunimullu qinersinissaq innuttaasutut pisussaaffiuvoq.