Air Greenland kiisalu Tusass: Mittarfiliornermut akiligassaq atuisartunut tutsinneqassanngilaq

Qaqortumi mittarfissamut aningaasartuutissat Naalakkersuisut iluatsimmatigit mittarfissap piviusunngornissaa qanilliallappoq.

Aappagumut aningaasanut inatsit sisamanngormat partiit sisamat, Inuit Ataqatigiit, Naleraq, Demokraatit aamma Atassut, atsioqatigiinnerisigut, sanaartugassamut 462 millionit illukartinneqarput.

Aningaasat taakkua amerlanersaat landkarsimiit matussuserneqassapput, ingerlatsivinnili Namminersorlutik Oqartussat pigisaanni aningaasartuutissatut missingersuutit partiit qimerlooreerlugit aningaasartuutissatik naammassivaat.

Aningaasat ilaat Air Greenlandimeertuussapput. Tassannga politikerit 65 millionit ataasiarluni tigusassatut aaniarpaat. Ingerlatsiviulli niuerneranit toqqaannartumik taakkua tiguneqartussaanngimmata, timmisiartuutileqatigiiffiup artorsaatigissanngilai.

AAMMA ATUARUK Partiit sisamat aningaasanut inatsit pillugu isumaqatigiittut

Siulersuisut siulittaasuat Bodil Marie Damgaard taamatut oqarpoq.

- 65 millionit taakkua Namminersorlutik Oqartussat oqartussat timmisartornerannut atugasiissutiginikuugaluarpaat. Oqartussat timmisartornissaat pineqartut tassaapput coronamut atatillugu timmisartuussinerit, taanna oqarpoq.

- 2021mi 2020mitulli taama amerlatigisunik aningaasartuuteqarnissaq pisariaqanngitsoq paasinarsinikuuvoq. Taamaammat oqartussanik timmisartuussinissamut atugassiissutaangaluartut taakkua ilagaat.

Oqartussanik timmisartuussinermik taagukkat tassaapput coronap tuniluunnerata nalaani Air Greenlandip immikkoortinnikuusai. Kalaallit Nunaannut iseqqusaasoqanngimmat, assersuutigalugu peqqinnissaqarfimmi sulisut immikkut akuersissutillit ingerlatsiviup angallannikuuai.

Aningaasallu kontomut tassunga atugassatut aalajangiunneqarnikuummata, atuisartut malussarnavianngillat, pisortaq neriorsuivoq.

- Aningaasat taakkua uagutsinnut tuttussaanngitsut ilisimanikuugatsigu atugassatsitut naatsorsuutiginikuunngilagut. Taamaammat aningaasat taakkua ingerlatsinermut imaluunniit bilitsinut sunniuteqassanngillat, Bodil Marie Damgaard oqarpoq.

Tusassip annertuumik iluanaaruteqarnissami piareersarnissaanut piffissaqarnerussagami nuannaarutigaa

Namminersorlutik Oqartussat ingerlatsiviutaa alla, Tusass, malunnaatilimmik annertunerusumik Qaqortumi mittarfissamut aningaasaleeqataassaaq. 

Ukiunimi 2026miit 2028mut nalunaarasuarnermut allakkerinermullu ingerlatsiviup Tusassip 150 millioni koruuninik iluanaaruteqarnissaa politikerit naatsorsuutigaat. 

Atuisartunut sulisunullu annerusumik malunnaateqanngitsumik ingerlatsiviup tamanna naammassisinnaavaa, siulersuisut siulittaasuat Stine Bosse oqarpoq. 

- Ukiuni kingullerni aningaasaqarnikkut ingerlalluarnitsigut iluanaarutit inuiaqatigiinnut utertinneqarnissaat kiisalu atuisartunut akit appartillugillu pitsaassutsip pitsanngorsanissaa anguniarnikuuarput.

- Apeqqummut akissutissaq tassaavoq, naamik, atuisartut pitsaanngitsumik malugisaqassanngillat, Stine Bosse oqarpoq. 

AAMMA ATUARUK Aalisakkat mittarfissaq piviusunngortissagaat: Qaqortumi mittarfissaq ima aningaasaliiffigineqassaaq

Aningaasat aatsaat 2026mi isaalissapput. Taamaammat Namminersorlutik Oqartussat 150 millioninik atorfissaqartitsilernissaannut piffissaqarluarpugut. Taamalillunilu Tusassip pilersaarutimi naleqqussarnissaannut piffissaqarluarpoq, Stine Bosse nassuiaavoq. 

- Aningaasaqarnerput ataatsimut isigalugu aaqqissuuttarparput iluanaarutissatut naatsorsuutigineqareersut ilanngussorlugit, kiisalu Namminersorlutik Oqartussat aningaasanik uagut tunniussinnaasatsinnik amerlanerusunik pisariaqartitsisinnaanerat pillugu atassuteqarfigiuarlutigit.

- Taamaammat aaqqissuussinissatsinnut piffissaqarluarpugut, atuisartunut sulisunullu nuanniitsunik tassanngaannaq tuttoqarnissaa pinaveersaarlutigu.

- Piffissaq sioqqutingaatsiarlugu kalerrisaarneqarnerput uagut nuannaarutigaarput, tamanna naapertorlugu ingerlatsinerput aaqqissuussinnaassagatsigu, Stine Bosse oqarpoq. 

Qaqortumi mittarfiliassaq ataasimut aalajangiussanut ilanngusaavoq. Nuummi Ilulissanilu sanaartornerit aallartereerput, kujataanili sanaartugassap aallartinneqarnissaa politikerit suli iluatsinnikuunagu.

Tamatumunnga pissutaavoq, siornatigut Naalakkersuisuusimasut mittarfiliassamut aningaasartuutissatut missingersuutaasa annertussusaat naapertorlugit, suliffeqarfinnik sanaartuisinnaasunik nassaarsinnaanikuunnginnerput. 

Sanaartugassalli qanoq aningaasalersorneqarsinnaaneratut politikerit Aningaasanut Inatsimmi nutaami missingersuuteqarput.