Ajornartoornermi ataatsimiinneq sakkuaakkunnaarfiunanilu siuariarfiunngilaq

Tyrkiami nunanut allanut ministerit ataatsimiinnerat Ukrainemi sorsunnerup unitsinneqarnissaa eqqarsaatigalugu isumalluarfiugaluartoq siuariarfiunngilaq.  

Sisamanngornermi ullo’qeqqata siornatigut taama inerniliisoqarpoq.

Illua’tungeriit Ruslandip nunanut allanut ministeria  Sergej Lavrov aamma Ukrainep nunanugt allanut ministeria Dmytro Kuleba ataatsimiinnerup kingorna tamarmik immikkut oqaaseqarput.

- Sakkuaakkunnaarnissaq oqaluuseraarput, ulloq unnuarlu sakkuaakkunnaarneq, kisianni siuariarfiunngilaq, sinerissami illoqarfimmi Antalya ataatsimiinnerup kingorna Dmytro Kuleba oqarpoq.

Ilutigalugu neriorsueqqippoq Ukraine tunuaannarnavianngitsoq.

- Oqaatigeqqikkusuppara Ukraine tunniutiinnanngimmat, tunniutiinnassanngimmallu, nunamnut allanut ministeri oqarpoq.

Ataatsimiinnerup pingaarutilinnik angusaqarfiunissaa ataatsimiinneq sioqqullugu neriuutigineqarpaallanngilaq.  Sapaatip akunnerata kingulliup ingerlanerani russit Ukrainemiullu sinniisaasa akornanni isumaqatigiinniarnerit aamma iluamik siuariarfiunngillat.

Ataatsimiinnerup kingorna Sergej Lavrov ilaatigut oqarpoq Dmytro Kuleba eqqaasissimallugu Ruslandip Ukraine paasitissimammagu sorsunneq unitsinniarlugu qanoq iliortoqassanersoq.

Rusland siusinnerusukkut nalunaarpoq Ukrainep sakkutuulersornerit unitsissagai inatsisinilu tunngaviusut allanngortissagai arlaannaannilluunniit tapersersuisuunnginnissamik imaqalersillugit.  

Saniatigut Ukrainep Krim russit nunaannut ilaammat akuerissavaa. 2014-imi Ruslandip sakkut atorlugit Krim tiguarpaa.