Aki-Matilda Høegh-Dam: Danmarkimi Kalaallit oqaasii radiokkut nukittorsarneqassapput

Kalaallinut Danmarkimi najugalinnut kalaallisut radiukkut aallakaatitsisoqartalernissaanut aningaasaliinissaq, Folketingimi isumaqatigiissutigineqarpoq.

Allattoq Marie Kûitse Kristensen

decembarip 11-at 2021 11:10

Tamanna Folketingimi ilaasortamit Siumumeersumit Aki-Matilda Høegh Damimit, siunnersuuteqartuusumit, nuannaarutigineqarpoq.

- Siumut folketingimiit aningaasaliivugut aningaasaqarnermut inatsit aqqutigalugu, Danmarkimi kalaallisut radiukkut ingerlatsitsisoqarsinnaanissaa pillugu. Danmarkimi kalaallit najugaqartut oqaatsitik kulturertillu attatiinnarsinnaanissanut aamma atatillugu periarfissiinissanut, aamma killeqarpallaarnera eqqarsaatigalugu, Aki-Matilda Høegh Dam oqarpoq.

Folketingimi aappaagumut aningaasanut inatsisissaqpillugu partiit arlallit isumaqatigiissuteqaqqammerput.

AAMMA ATUARUK Danskit aningaasanut inatsisissaat kalaallisut radiomut meeqqanullu illunut aningaasaliinertaqartoq

Kalaallinut Danmarkimi najugalinnut kalaallisut oqaalulluni radiukkut aallakaatitsisalernissamut 2022-miit 2025-imut aningaasaliissutit 7 miollionit koruuninik nalillit Isumaqatigiissutip ilaagaa.

Kalaallit Danmarkimi najugaqartut ullumikkut 17.000-it missaanniipput.

Qanorpiarlu radiukkut aallakaatitsisarnissaq ingerlanneqartassanersoq, Danmarkimi piorsarsimassutsikkut kultureqarnermullu ministerilu isumaqatigiinniutigissagitik, Aki-Matilde Høegh Dam oqarpoq.

- Eqqartuinitsinni aamma paasivarput immikkut radiokanalimik pilersitsinissaq akisungaatsiartoq. Kisianni periarfissaqarami radiokanalip allap ataani pilersitsisoqarsinnaasoq, imaluunniit interneti aqqutigalugu immikkut radio podcastimik sanasoqarsinnaanissaa.

Danmarkimi Kalaallit aallakaatitassiarineqartassapput

KNR radio tv-lu Danmarkimi isiginnaarneqarsinnaalluni tusarnaarneqarsinnaavoq. Uanili Kalaallit Danmarkimi najugalinnut toqqaannartumik aallakaatitsinerussaaq.

- Uani radiukkut kalaallisut aallakaatitsisalernissaa naleqqussagaanerunissaa takorloorparput. Assersuutigalugu Kalaallit Danmarkimi ilinniariartut immaqaluunniit Kalaallit Danmarkimi najugaqartut inuuneranni pisartukujuit aamma eqqartornerussallugit, Folketingimi ilaasortaq, Siumumeesoq, Aki-Matilda Høegh Dam KNR-imut oqarpoq.

Danmarkip aappaagumut aningaasanut inatsisissaa decembarip ulluisa 21-ani pingajussaaneerneqassaaq.

Nutaarsiassami kukkunermik nassaarsimaguit uunga allaffigineqarsinnaavugut.