Aki-Matilda Høegh-Dam: Sulilluta aallartereerpugut

Folketingemi nunarput sinnerlugu qinigaaqqammersut Aki-Matilda Høegh-Dam aamma Aaja Chemnitz maanna Danmarkimut apuutereersimalerput, taakku tusarniarpagut sumut killinnersut aammalu sulinissaminnut qanoq alloriaqqinniarnersut.

- Aap tassami sulineq ingerlaannaavik aallartittarpoq aqaguani aamma partiit assigiinngitsut oqaloqatiginissaat, immikkut aamma isumaqatiginninniutissat piareersarneqarput tallimanngormallu isumaqatiginninniarnerit aallartisarneqavipput maanga Danmarkimut meqqammiinnaavilluta, Siumut sinnerlugu Folketingimi ilaasortanngoqqittoq Aki-Matilda Høegh-Dam KNR-mut oqarpoq.

Taassumali allaffitoqqani allaffigeqqiinnassanerlugu suli qulakkiinngilaa:

- Allaffinnut tunngatillugu suli tusagaqanngilagut kisianni neriuppugut allaffipput nuuttariaqarnagu aamma nuussagaluarpat suliarujussuussagami kisianni paasinarsiumaarpoq nutsertariaqalissagutta nuussanerluta. Tassa taamaattarpoq partiit nutaat isertut aamma allaffittaartaramik, taanna oqarpoq.

Alloriarneq tulleq

Aki-Matilda Høegh-Dam alloriarneq tulleq suussanersoq aperineqarami ima akivoq:

- Massakkorpiaq isumaqatiginninniarnerit pingaarnerpaapput, taakku apeqqutaallutik inissereerpata aatsaat paasinarsissaaq naalakkersuisuutitassat qanoq inissittussanngussanersut. Aningaasaqanermut inatsit taannaavoq pingaarnerpaaq, taava taassuma saniatigut ataatsimiititalianut inississussaagut. Aammalu oqaluttarfimmiit apeqqarissaarnissat soorlu ministeriunermut apeqqarissaarnissat piareersarneqassapput, Aki-Matilda Høegh-Dam oqarpoq.

Aki Matildelli qinigaaqatinilu Aaja Chemnitz qanorpiaq suleqatigiinnissartik itisilerusunngilaa:

- Tatigeqatigiinnissaq apeqqutaavoq taamaattumik massakkut taanna akissallugu tunuarsimaalaarpunga, Aki-Matilda Høegh-Dam oqarpoq.

Aaja Chemnitz Aki-Matildatulli oqaaseqartinniaraluarparput taannali oqaaseqarusunngilaq.