Aki-Matilda Høegh-Dam: Naalakkersuisut politikkiannut kissaatigut ersarissumik allaqqapput

Mette Frederiksenip Danmarkimi naalakkersuisoqatigiilertussat nutaat tusagassiortunut ippassaq kiisami nalunaarutigaa. Tassaasut Socialdemokratit, Venstrekkut Moderatillu. Naalakkersuisoqatigiilersut folketingimi issiasuutitatta marluullutik taperserpaat.

- Amerlanerussuteqartumik naalakkersuisoqatigiinnermik pilersitsinissaq tapersersimavarput, ilaatigut soorlu alimmasissumik naalakkersuisoqatigeerusulernerat, aappaluttut tungujortullu akulerullugit. Anguniakkagut assigiinngitsut tallimat toqqaannartumik allassimalersimanerat, aamma nuannaarutigivarput.

Nunarput ilaatinnagu nunarput pillugu aalajangiisoqartassanngilaq

Naalakkersuisoqatigilernissanut tunngaviusussat quppernerni 54-iusuni naalagaaffeqatigiinneq pillugu tunngaviusussanut tunngasut quppernerit marluinnaapput.

Quppernerilli taakku marluk Siumukkut qineqqusaarutigisaannut attuumassuteqarnerat ersarittut, Aki-Matilda Høegh-Dam oqarpoq.

- Uani naalakkersuisoqatigiinnissamut tunngaviusussanut ersarissunik kissaateqarnikuuvugut. Danmarkip oqartussaaffigisai massakkut ingerlanerluttorujussuit sumiginnakkat inerisaqqinneqartariaqarneri. Assersuutigalugu kalaallinit aqunneqartumik allattoqarfinnik pilersitsinissap isumannaarnissaa, tassa tamakku nuannaarutigaagut.

AAMMA ATUARUK Naalakkersuisoqatigiilersussat meerartatsinnik inuusuttatsinnillu ikiuinermut aningaasaliisassasut – peqqinnissaqarfimmulli tunngasut eqqaanngikkaat

- Naalakkersuisut peqataatinnagit nunarput pillugu aalajangiisoqartassanngilaq. Taanna aamma naalakkersuisoqatigiilernissamut tunngaviusussani ersarissumik allaqqavoq, taanna erseqqissaavoq.

50 millionit koruunit meeqqanut inuusuttunullu atorneqassasut

Meeqqat inuusuttullu nunatsinniittut sumiginnakkat Naalakkersuisut suleqatigalugit naalagaaffimmiit ikiorserneqartarnerat ingerlaannassasoq, isumaqatigiissummi allaqqavoq.

Aningaasat toqqaannartumik eqqaaneqanngillat, naalagaaffimmiilli tapiissutit ukiumut 4 milliardit koruunit sinnerlugit tapiissutigineqartartut saniatigut 50 millionit koruunit meeqqat inuusuttullu kinguaassiutitigut kannguttaatsuliorfigineqartarnerisa akiorniarneranut atugassanik Namminersorlutik Oqartussat tunineqartarput.

KNR-ip paasisai naapertorlugit aningaasat tapiissutigineqartartut taamaaginnassasut naalakkersuisoqatigiilersussat akuerisimavaat. 

- Aningaasanut inatsisissat pillugu isumaqatiginninniartoqalerpat eqqartussagipput naatsorsuutigaara, kisianni naalakkersuisut qanimut suleqatigineqarluinnassapput, Aki-Matilda Høegh-Dam oqarpoq.