Akileraarutinit utertuussanerlutit akiliissanerlutilluunniit takuuk

Akileraartarnermut aqutsisoqarfiup inaarummik naatsorsuutit innuttaasunut 49.154-inut e-Boksikkut nassiuppai. Amerlanerit utertoorutissaqarput.

Allattoq Nutaarsiassaqartitsivik / Nyhedsredaktionen

aggustip 30-at 2022 12:09

Inaarummik naatsoruutisiffissanngorpoq. Inaarummik naatsorsuutimmi sullissivik.gl-ikkut imaluunniit e-Boksikkut takusinnaalerpatit.

Inaarummik naatsorsuutit siorna akileraarutigisannik naatsorsuinerupput. Tassannga aningaasarsiaqarsimanersutit, ilanngaateqarsimanersutit akileraarutinullu akiliisimanersut takutinneqartarpoq.

Akileraarutinit utertuussaguit taakku aningaaserivimmi kontunnut ullumi aqaguluunniit ikissasut, Akileraartarnermut Aqutsisoqarfik nalunaaruteqarpoq.

Akiliivallaarutit katillugit 301,5 millionit koruunit innuttaasunut 32.236-nut utertinneqassapput.

Sulinermut ilanngaat 2020-mit atuutilersinneqarpoq. Ilanngaat isertitatit tunngavigalugit naatsorsorneqartarpoq. 301 millionit koruuninit utertinneqartussanit 71,8 millionit koruunit sulinermut ilanngaatineersuupput.

8.530-t akileraarutissat sinnerinik akiliissasut

Aningaasanik taarsigassaqaruit assersuutigalugu kommunimut, INI-mut imaluunniit Nukissiorfinnut akileraarutinit utertuugassannit taakku nusunneqassapput.

301,5 millionit koruuninit 98,1 millionit koruunit (33 procentiisa nalingi) pisortanut akitsuutinut ilanngaatigineqassapput.

Kikkulli tamarmik iluatsitsillutik utertuugassaqanngillat.

Akileraartartut 8.530-t akileraarnikippallaarsimapput, taamaammallu akileraarutinut akiliutinut ikinaarutaasunik akiliissapput. Taakku katillugit 139,7 millionit koruuniusut, Akileraartarnermut Aqutsisoqarfik nalunaaruteqarpoq.

Nutaarsiassami kukkunermik nassaarsimaguit uunga allaffigineqarsinnaavugut.