Akiuussutissamut kapitittussaanermik allakkat kingornatigut qatserisartut utoqqatserfigitipput
Utoqqatserpunga. Paatsoorneruvoq kukkunerullunilu.
Akiuussutissanik kapitinnerit pillugit suliap akerleriissutaaqisup kingornatigut qatserisartut taama nalunaarfigineqarnissartik ilimagissavaat.
Suliarmi imaakkami qatserisartut upalungaarsimanissamut pisortap tullianit 24. januaarimi Jens Mikkelsenimit allagarsipput . Allakkat kommunip ”qatserinermut sulisui”-nut nalunaarutaapput coronamut akissutissamik kapitissimassasut qatserisartutut sulissagunik.
”Tamatuma kingunerisaanik piumasarineqarpoq qatserisartut akiuussutissamik kapitinneq 4. februaari 2022 aallartissimassagaat. Kapitinneq Nuummi ingerlanneqassaaq,” allakkani allaqqavoq.
Tamatuma Poul Olsen puffaammertippaa. Qatserisartut peqatigiiffiaanniut siulittaasuuvoq.
Akiuussutissamik kapitinneq pinngitsaaliissutaanngilaq
-Tassa naluneqanngitsutut coronamut akiuussutissamik kapuuineq eqqarsaatigalugu nunatsinni taanna pinngitsaaliissutaangilaq, aammalu pinngitsaaliissutaasinnaanani.
Taavalu kommune saaffigaa:
- Kalaallit Nunaanni Qatserisartut Peqatigiiffianiit taanna qisuariarfigalugu sakkortuumik uparuarparput, paaserusullugulu inatsit taanna suna tanngavigalugu taamatut pinngitsaaliillutik kapuuinissamut piumasaqaateqarnersut.
Aammami kukkuneruvoq, Hans Ulrik Skifte nassuerpoq. Kommunimi sanarfinermut avatangiisinullu ingerlatsivimmi pisortaavoq..
- Naatsumik oqaatigalugu allaffissornitsinni maani kukkusimavugut, oqarpoq.
Poul Olsen KNR-imut oqarpoq qatserisartut marluk piumassuserinngisaminnik akissarsiaqarnatik angerlartinneqarsimasut, akiuussutissamik kapitikkumannginnamik. Aappaa sulileqqereerpoq - aappaalu uterumanngilaq.
- Qatserisartut uku pineqartut ullumikkut attavigineqassapput utoqqatserfigineqassallutillu, taavalu annaasaqassanani, Hans Ulrik Skifte oqarpoq.
Deltaqarnerup nalaanit sinneruttoq
Qatserisartut akiuussutissamik kapitinneqartussaatitaanermik allagarsinerat deltaqarnerup nalaaneersumik tunngaveqarpoq.
Siorna upernaakkut deltaqaleruttormat piumasaqaataavoq qatserisartut akiuussutissamik kapitissasut. Kisianni piumasaqaat taanna atorunnaarsinneqarnikuuvoq, deltalu annertunerpaajunnaareerpoq.
- Kukkunikkut aamma massakkut taamaalisoqartoorsimavoq, taanna inatsit inatsisaagallarnikoq taamani suli atuutsinneqarsoralugu qisuariartoqarsimavoq, taannalu paasigatsigu atorunnaarsipparput, tamannalu ullaaq pivoq, Hans Ulrik Skifte oqarpoq.
Neriorsuivoq kommune assinganik kukkoqqissanngitsoq utoqqatserniarlunilu. Kisianni Poul Olsen isorniarpoq.
- Neriuppunga taama pisoqaqqissanngitsoq – kisiannimi allakkat kukkusumik tunngaveqarluni nassiunneqarput. Aalajangiineq kukkuneruvoq. Suliaq uggornaqaaq, oqarpoq.
