Akunnaami Âdap atuarfia ukiunik 70-inngortorsiortoq
Avannaani Aasiaat nunaqarfiani Akunnaami meeqqat atuarfiat, Âdap atuarfia ukiunik 70-inngortorsiorpoq.
Atuarfik Âdap atuarfia Akunnaami 1952-imi atoqqaarfissiorneqarpoq.
Atuarfiup nalliuttorsiutigineqarnera malunnartillugu, innuttaasunut tamanut atuarfimmi marlunngormat kaffillertoqarpoq.
Akunnaami meeqqat atuarfiani atuartuusimasut ilaat, Gert Nielsen kaffisoriartunut ilaavoq.
- Qallunaat ilinniartitsisut siulliit atuarfigeqqaarpagut taakku Valderikkut. Nulia Jettemik ateqaqqooqaaq, taava panii Vibekkemik Mariannemilu ateqarput, Âdap atuarfiani 1964-imi atuartunngorsimasoq, Gerth Nielsen, taama eqqaamasalersaarpoq.
Âdap atuarfiani atuartut katillugit ullumikkut arfineq pingasuinnaapput.
Internetti allannguisoq
Gert Nielsenikkulli meeraagallarmata atuartoqarnerusimaqaaq.
- Meerarpaaluuvugut taamanikkut atualertut, taamanikkut atuartorparujuupput meerarparujoqarami manna atuarfik ulikkaarlugu. Eqqaamanngilara qasserpiaanersut, taanna oqarpoq.
Âdap atuarfiani taamanikkut atuartut ilaat Aasiannut atuariartortinneqartarsimapput.
Akunnaarmiu Grethe Olsen Âdap atuarfini 1960-ikkunni aamma atuartuunikoq nalliuttorsioqataavoq.
Taanna quliinnarnik ukioqarluni Aasiannut atuariartortitanut ilaanikuuvoq. Ullumikkulli internetti atorlugu Aasianniit atuartitsisoqartalernera alutorsaatigeqaa.
- Qallunaatut, tuluttut, kisitsinermilu Gammeqarfimmiit atuartinneqartut alutornartarpoq, Grethe Olsen oqarpoq.
Atuartut arfineq pingasut
Âdap atuarfiani ullumi atuartut katillutik arfineq pingasuupput.
Atuartut tamakkerlugit klassimi ataatsimi atuartinneqartarput, marlunnillu ilinniartitsisoqarluni.
Minik Olsen
Minik Olsen Akunnaami Âdap aturfiani 4. klassimi atuartoq naapipparput.
Maani atuartuulluni qanoq ippa?
- Ajunngilaq.
Maani atuaraangassi susarpisi, sutinneqartarpisi?
- Atuakkeritittarpaatigut.
Karlo Thomassen
Karlo S. Thomassen Akunnaami Âdap atuarfiani 7. klassimi atuartoq aamma naapipparput.
Atuarfimmi atuartitsissutit suut nuannaraagit?
- Tuluttut atuarneq.
Siunissami sunngussanerlutit eqqarsaatigilereerpiuk?
- Naamik.
Âdap atuarfiani atuartut 8. klassinngoraangamik Aasiannut atuariartortinneqartarput.
Nunaqarfik Akunnaaq ullumikkut 66-inik inoqarpoq.
