Albatros Greenlandip Kangerlussuarmi allileriniarput

Sermersuarmi pisuttuarneq, umimmanik takornariarneq eqalunnillu aalisarneq, tammakkua Albatrosip tammaartarfiliassamini illuaraqarfittaassaminilu ussassaarutiginiarpai.

Kalaallit Nunaannut isaariaq aamma takornariarfissaassaaq. Albatros Arctic Circle siulittaasua, Søren Rasmussen, taama oqarpoq.

- Kangerlussuarmi sammisassaqartorujussuuvoq, takornarialli Kangerlussuarmiittarnerat sivikittarnikuuvoq, tamaammat piffissanngorpoq takornariat Kangerlussuarmiinerusarnissaat, aammalu tamatuminnga ornigussatut isiginninnerulernissaat, Søren Rasmussen taama oqarpoq.

Taamaalissappalli takornariat tikileralernissaannut atortorissaarutinik unnuiffissanillu sanaartornissaq pisariaqarpoq.

- Aajuitsup Tasiata Isunnguatalu sermiata qanittuani amerlanerusunik tammaartarfiliornissaq aalisarianullu aallaarsimaarfiliornissaq tassaapput pilersaarusiassatta ilaat, Søren Rasmussen taama oqarpoq.

Albatros Greenlandip Kangerlussuarmi allilerinerannut Kina-miit Amerikap Avannaniillu soorlu maratonerluni pisoruloorlunilu timersortartorpalaarnik sammisaqarneq piumaneqartuummat pissutaavoq.
Tamakkuninngalumi aallussiniarput.

- Inissat ilorrisimaarnartut najorneqarsinnaasut taavalu sammisassat assorornartuusinnaasut imminut misilittarfiusinnaasut, tamakkua soqutigineqarput, Søren Rasmussen taama oqarpoq.

Taava aamma Kangerlussuarmiit umiarsualivissamut qamutinik immikkut sanaanik takornariartitsianiarput, siunissamilu Sisimiumut qamutimik ingerlasinnaaneq neriuutigaat.