Anaanaq Qeqqata Kommuniani atuanngiffimmut qilanaartoq: Meeqqagut ernguttagullu eqqissilluta pileqatigisinnaanngorpagut

Ilaqutariit Maniitsormiut Skiftekkut aasaru meeqqat atuanngiffeqarneranni piffissaq sivisunerusoq eqqissillutik tuttunik Kangerlusuarmi pilillutik atorniarpaat. Tamannalu atuartunut marlunnut aanajusup qilanaaraa.

Allattoq Marie Kûitse Kristensen

marsip 20-at 2022 10:48

Qeqqata Kommuniani meeqqat atuarfianni atuartut aasaru atuanngiffeqareerunik pisarnermuit kingusinnerusukkut atuaqqilissapput.

Aavarneq aggustip aallaqqaataani aallartippat meeqqat angajoqqaatit peqatigalugit eqqissillutik pilisinnaanngornissaat, Qeqqata Kommuniani kommunalbestyrelsip siorna innersuutigaa.

Bolethe Skifte Maniitsormiuuvoq, uinilu sisamanik meeraqarput tallimanillu ernutaqarlutik.

Taakku Qeqqata Kommuniani meeqqat atuarfianni aasaanerani atuanngiffeqartarnerit aavarfimmut naleqqussarneqarnerat nuannaarutigeqaat.

AAMMA ATUARUK Augustimi ilinniagassat alarlugit aallaat tigusassanngortoq: Qeqqata Kommuniani aavarfiunerani atuanngiffeqartalertut

Skiftekkut aasakkut aavarfinngoraangat Kangerlussuarmut piliartortarput.

- Siunnesuut tusaqqaarakkuli aalajangiiffigineqarnissaa pissanngatiginikuuara, akuerineqarnissaami kissaatiginikuugakku, Bolethe Skifte oqarpoq.

Taassuma ernutai marluk suli meeqqat atuarfianni atuartuupput.

Skiftekkut aasakkut Maniitsumiit Kangerlussuarmut meeqqatik ernuttatillu atuartut ilagalugit ullut arlallit tuperlutik tuttunik piniakkaminnik piliartortarput. Tuttunik pisaaminnit toqqit eqqaanni panertitsisarput, silarli aamma panertitsiniarnermut apeqqutaasartoq taassuma oqaatigaa.

- Assut nuannerpoq, meeqqat atuanngiffeqarnerat sivitsorneqarnerat. Meeqqat atuarfianni atuartunik ernutaqaratta, pilitilluta atuaqqileraangata tuaviinnaq tuaviinnaq angerlarniarpallattaratta.

Bolethe Skiftikkut ernerat Aqqaluk Skifte, ernutaallu Inukkuluk Lyberth tuttumik perngartoq.

Kommunalbestyrelsi atuanngiffeqarneq nalimmassaasoq

Qeqqata Kommuniani aggusti naalerpat aatsaat taqualiornerit makiaarnerillu pissapput. Aavarneq aggustip aallaqqaataani aallartippat meeqqat angajoqqaatit peqatigalugit eqqissillutik pilisiartorsinnaanngorput.

Nive Heilmann Efraimsenip tamanna nuannaarutigaa. Taanna Qeqqata Kommuniani kommunalbestyrelsimi Inuit Ataqatigiit sinnerlugit ilaasortaavoq, aasaaneranilu atuanngiffeqarnerup kulturitsinnut nalimmassarnissaa sorsuutiginikuuaa.

- Soorunami nuannaarpunga, aamma atorluarnissaanut qilanaarpunga, Nivi Heilmann Efraimsen oqarpoq.

Eqalunniarnerit, kapisilinniarnerit, aavarnerit, umimmanniarnerit allallu aasaanerani pisarput. Takkulu pineranni meeqqat atuanngiffeqartariaqarmata kommunalbestyrelsimi ilaasortap anguniarsimavaa. Tamannalu maanna iluatsimmat atuartut nunatsinni inooriaasitsinnik aallussinerulissasut Nivi Heilmann Efraimsenni oqarpoq.

- Periarfissaqarnerulissaagut pilersornerusinnaanissatsinnut eqqissilluta tuaviupilugata inooriaaserput atorlugu, taanna oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.