Angajoqqaanut kaammattuut: Meeqqat 13-it inorlugit ukiullit arfineq-pingasunut angerlareersimassapput

Kommune Qeqertalimmi angajoqqaat kommunalbestyrelsimit kaammattuiffigineqassapput: Kommunip illoqarfiini sisamani nunaqarfinnilu arfinilinni meeqqat inuusuttullu unnukkut aneeraangamik piffissami aalajangersimasumi angerlareersimassapput.

IA-mit kommunalbestyrelsimut ilaasortap, Mariane S. Larsenip meeqqat inuusuttullu unnukkut angerlareersimanissaanut piffissaliinissamik angajoqqaat kommunalbestyrelsimit kaammattuiffigineqarnissaat siunnersuutigaa.

Inuit Ataqatigiinneersup, Mariane S. Larsenip, 13-t inorlugit ukiullit kingusinnerpaamik unnukkut nalunaaqutaq arfineq-pingasunut, 17-nillu tungaanut ukiullit, nalunaaqutaq qulinut angerlareersimasarnissaat siunnersuutigaa.

- Meeqqat illoqarfimmi sequtseralutik serlersaaralutik immaqalu aamma unnussuarmut aneerlutik uffa massa aqaguani atuariartortussaallutik, taanna oqarpoq.

Angajoqqaaq tapersiisoq

Sivertinnguaq Samuelsen Qasiannguani najugalik arfinilinnut ataataavoq. Taassuma Mariane S. Larsen isumaqatigaa.

- Aserorterinerit, kattussinerit tillinniarnerit tamakkorpassuit ersarissigaluttuinnarneranni taanna ilalernartorujussuuvoq, Sivertinguaq Samuelsen KNR-mut oqarpoq.

Taassuma meerai angajulliit inuusuttuaraapput, taannalu Juunarsip Atuarfiani siulersuisuni siulittaasuuvoq.

IA-mit siunnersuut aasaaneranut meeqqat inuusuttullu unnukkut seqernup tarrissaarnerani aneertarfiannut aamma atuuppoq.

- Killissaminnik qaangiiffigineqaratarsinnaaneri aamma tassuunakkut illersorsinnaassagatsigit, Sivertinnguaq Samuelsen oqarpoq.

Kommunimi sulisumik meeqqanik nakkutilliisoqalernissaanik siunnersuuteqarnissamut pilersaaruteqanngilaq.

- Ataqqisariaqarpagut aamma angajoqqaat taakku akisussaasuummata. Tassungalu piartornissamut akisussaassusermik namminneq aamma tigusisariaqarput, Mariane S. Larsen oqarpoq.