Angajoqqaat kajumissaaruteqartut: Meeqqat akunnerpassuarni siuleriiaattariaqarunnaassapput
Coronamik tunillatsissimasut ullut tamangajaasa aatsaat taama amerlatigisarput. Tamannalu peqqinnissaqarfimmut innuttaasunut misissortinniartunut isumaginninniarnerannut immikkut ittumik ilungersunartitsivoq.
Coronavirusimut misissortikkiartorlutik siuleriiaattut qiviaraanni amerlasuut meeraallutillu inuusuttuupput. Meeqqat inuusuttullu ataatsimuukkajunnerat, akiuussusersorneqarsimannginnerallu ilaatigut pissutaavoq.
AAMMA ATUARUK Meeqqat illersuisuata corona malittarisassat paasissutissartaat ersarissut amigaatigigai
Ulluinnarni paaqqinnittarfinni atuarfinniluunniit tunillatsissimasoqaraangata meeqqat sinneri angerlartinneqarneq ajorput. Angajoqqaat meeqqamik misissortinnissaat taarsiullugu kajumissaarneqartarput. Taama aaqqissuussineq Nuummi angajoqqaajusut ilaasa naammagiunnaarpaat, atsiornernillu maanna katersillutik.
- Angajoqqaarpassuulluta meeqqatta ukiarli testertikkiartortaqattaarnerat sapaatip-akunneranut minnerpaamik ataasiarluta imaluunniit arlaleriarluta testertikkiartoqattaartaratta, tamannalu meeqqatta taama pineqartarnerat akuerisinnaannginnatsigu, atsiornernik katersilersoq, Nitta Lyberth-Mørch KNR-imut oqarpoq.
Meeqqat angerlarsimaannartussanngortinneqarlik
Meeqqat misissortikkiartoqattaartinnagit angerlarsimaannartinneqartarnissaat taassuma orniginartinneruaa, nappaat taamaaliornikkut tuniluunnaveersaartinneqarsinnaasoralugu. Nappaammi meeqqat inuusuttullu akornanni tuniluuttupilussuusoq taanna oqarpoq:
- Pissutsit taamaanneranni paasiuminaappoq sooq meeqqani tuniluunneq unikaallatsinniarneqannginnersoq. Angajoqqaajusugut akuersaarsinnaajunnaarparput meeqqatta taamatut pineqarnerat, taamaammallu piaarnerpaamik tuniluunnerup unikaallatsinnissaa anguniarlugu iliuuseqartoqartariaqarpoq, Nitta Lyberth-Mørch Kommuneqarfik Sermersuumi borgmesterimut Charlotte Ludvigsenimut allakkami ilaatigut oqarpoq.
Meeqqat tallimaniit aqqanilinnut ukiullit akiuussuserneqarnissaat pilersaarutaavoq. Ukioqatigiiaanulli taakkununnga akiuussusersuinissamik pilersaarut qaqugu piariissanersoq suli ilisimaneqanngilaq.
Meeqqat siullinngortillugit inersimasut utaqqisinneqarlik
Taassuma meeqqanut immikkut misissuisarfimmik utaqqisarfimmilluunniit piaarnerpaamik pilersitsisoqartariaqartoq allakkamini aamma piumasaraa.
- Inersimasutut naammagittakutsoorsinnaavunga akunnerpassuit nikorfallunga utaqqillunga, kisianni tamanna meerartavut uagutsitulli taamatut naammagittartinneqarsinnaanngillat. Meeqqat tunuleriiaarpassuit inersimasorassuit akornanni inersuaq kiatseqqasoq imaluunniit silami qiiallutik inersimasutulli utaqqisinneqarsinnaannginnerat inersimasutulli, taanna akuerisinnaanngilaq, Nitta Lyberth-Mørch oqarpoq.
Misissortinnissamulli pissutsit atuuttut pillugit soorunami naammagittartussaatitaaneq ilisimallugilllu pissutsit qanoq ilungersunartiginerat ilisimaaralugu Nitta Lyberth-Mørchip erseqqissaatigaa.
Angajoqqaat 515-it atsiortitsinermut ataasinngornermi atsioreersimapput.
