Angut 18-inik ukiulik ujaarineqaleruttortoq

Angut 18-inik ukiulik maqaasineqartutut nalunaarutigineqarpoq. Angut taanna umiatsiaararluni Kangaatsiamiit Aasiannukarluni aallarpoq, sulili tikinnani.

Angut 18-inik ukiulik Kangaatsiamiit ataasinngornermi juunip 13-ianni ullaassakkut nalunaaqutaq sisamat missaanni aallartoq, Issittumi Sakkutooqarfik nalunaarpoq.

Angulli taanna Aasianni takuneqarsimanngilaq. Taamaammat ilaqutaasa nalunaaquttap akunnerini 17-ingajanni pissarsiarisinnaasimannginnamikku maqaasineqartutut ataasinngornermi unnukkut nalunaaqutaq 20.55 nalunaarutigaat.

Issittumi Sakkutooqarfik tusagassiutinut taama nalunaarpoq.

Angut taanna umiatsiaaraq Vitt 442 motoorilik atorlugu aallarpoq, aallaramilu qasertumik kavaajarluni.

- Ujaarineqartoq nassaarilertorneqarsinnaaniassammat annaassiniartartuvut soorunami ujaaseqquagut. Annaassiniartartullu ujaarineqartup sumiiffigigunagaanut apuunniapiloornialeruttorput, Issittumi Sakkutooqarfiup tusagassiutinut nalunaartartua Camilla Schouw Broholm oqarpoq.

Issittumi Sakkutooqarfik, nunatsinni politiit Air Greenlandilu ujaasinermi suleqatigiipput, inuillu allat kajumissutsiminnik aamma ujaaseqataallutik.

Illersornissaqarfiup umiarsuaa alapernaarsuut Air Greenlandillu annaassiniarnermi qulimiguua EC225-q atorlugit ujaasisoqarpoq. Illersornissaqarfiullu timmisartorsua C-130-q atorlugu Nuummiit ullumi marlunngornermi nalunaaqutaq 11.45 ujaasiartoqataajartortoqarpoq.