Angut 35-nik ukiulik hashimik anngiortumik eqqusseriartutut tigummigallagassanngortinneqartoq
Angut 35-nik ukiulik Eqqartuussisoqarfik Sermersuumi inatsit tunngaviusoq naapertorlugu ullumi killisiorneqarnermi kingorna ulluni 28-ni tigummigallagassanngortinneqarpoq.
Taanna hashimik 7,8 kiilumik anngiortumik eqqussisutut pasineqarpoq.
Angut hashimik annertuumik anngiortumik eqqusseriariartumik pasisaqarlutik Danmarkimi Akitsuusersuinermut aqutsisoqarfik Københavnimilu politiit nunatsinni politiinut nalunaaruteqarput.
Angut 35-nik ukiulik Kangerlussuarmut ippassaq tikippoq, tassanilu angutip nassataani hashi 8 kiilup missaaniittoq politiinit nassaarineqarpoq. Angut tigusarineqarlunilu aanngajaarniutit pillugit inatsimmik unioqqutitsisutut pasineqarpoq.
35-nik ukiulik inatsit tunngaviusoq naapertorlugu ullumi killisiorneqarpoq, taannalu eqqartuussivimmit ulluni 28-ni tigummigallagassanngortinneqarluni.
Inatsit tunngaviusoq naapertorlugu killisiuineq matoqqasumik ingerlanneqarpoq. Taamaammat Kalaallit Nunaanni Politiit suliamut tunngatillugu allamik oqaaseqarusunngillat.
