Angut 50-inik ukiulik aalakoorluni Maniitsumi angallammik ingerlatsisimasutut pasineqartoq
Angut aalakoorluni Kangaamiuniit aallarsimasoq politiit nalunaarput. Angut taanna maanna aalakoorluni angallammik ingerlatsisimasutut pasineqarpoq.
Angut aalakoortoq pillugu sisamanngormat 16. decembari nalunaaqutaq 14.30 Maniitsumi politiit kalerrinneqarput.
Kangaamiuni kommunefogedi ingerlaannaq talittarfimmukaraluarami angut 50-inik ukiulik najugaqatinilu aamma imigassartorsimasoq angallammik aallartut inortulaarlugit.
Kalaallit Nunaanni politiit taamatut nalunaarput.
Taamaamma nalunaaqutaq 17.00-ip missaani aappariit Maniitsumut tikimmata politiit parsiarpaat.
Angut immamut isippoq
Politiit angallat takugamikku 50-inik ukiulik qinnuigaat Aalisartut Aqqutaanni taleqqasarfiliaqqullugu. Angut taleriarluni siuanukartoq politiit biilitik inissillugit takuaat, biilinilli anigamik angut peqanngilaq.
Ammukarlutik angutip angalaqataa aperaat angut sumiinnersoq, taassumali aamma nalullugu sumiinnersoq. Imaanut qinnguartarlutik angut ilisimanani angallatip siuatungaaniittoq nassaaraat.
Politiit angut qaqikkamikku anersaartunngisoq paasivaat. Poltiit ikiueqqaarneq aallartikkaallu peqqissaavimmiit ambulancet takkupput. Tamatuma kingorna anugt napparsimmavimmi suliarineqarami aamma aaversippoq aava qanoq imigassartaqartigineqarsoq takuniarlugu.
Angut nappasimmavimmiit angerlareersoq politiit nalunaarput.
Inuit allat inuuneri ulorianartorsiortippai
Angutip qanoq imigassartorsimatiginera aatsaat aaversinneranit misissukkani takusinnaassangaluarlugu, politiit qularutiginngilaat angut imigassartorsimalluni angallammik ingerlatsisimasutut pasineqarnissaanut uppernarsaatit naammareerput.
Angut pasineqarnerminut nassuerpoq.
Tassunga atatillugu Kalaallit Nunaanni Politiit tamanut eqqaasissutigaat, angallammik ingerlatsissatillutik aalakoornartunik imernaveersaartaqqullugit. Immikkoortortaqarfinnut pisortaq, vicepolitiinspektør Johan Westen, oqarpoq:
- Pisumi uani angut aalakoorpallaarami imaanut nakkarsimasoq qularnanngilaq. Aalakoornartumik imersimallutit angallammik ingerlatsillutit siumut takusaqarsinnaannginnavit imaanut nakkaruit, taava imminut ukorianarrtorsiortiinnarnak aamma allat imaaniittut – minnerunngitsumillu angallammi angallatatit - ulorianartorsiussapput.
