Angut anaanaminik toqutsisimasutut tarnikkut nappaatilinnut napparsimavimmut inissinneqartussanngortoq
Angut 33-nik ukiulik Sisimiuneersoq anaanaminik siorna marsimi qimitsilluni toqutsisimasutut pineqaatissinneqarluni killiligaanngitsumik Danmarkimi tarnikkut nappaatilinnut napparsimmavimmiittussanngortinneqarpoq.
Kalaallit Nunaanni Politiit taama nalunaaruteqarput.
Qeqqata Eqqartuussisoqarfiata angutip anaanaminik sinittumik siorna marsimi qimitsisimasutut pasineqarneranut tunngatillugu suliaq arfininngormat aalajangiiffigaa,
Angut Sisimiuni politiinut toqutsinermi kingorna ullaakkut nammineerluni saaffiginnissimasoq suliami allassimavoq.
33-nik ukiulik tamatuma kingorna tigusarineqarpoq, tamatumalu kingorna suliap misissuiffigeqqissaarneqarnerata nalaani Danmarkimi tarnikkut nappaatilinnut napparsimmavimmi tigummigallarneqarluni.
Takorluuisarlunilu takorruuisartoq
Angut tarnikkut napparsimanersoq aamma misissorneqarpoq, nakorsallu eqqartuussivimmut siunnersuisartup angut tarnikkut nappaatilittut nalilerpaa, taamaammallu Danmarkimi tarnikkut nappaatilinnut napparsimmavimmi killiligaanngitsumi inissinneqarnissaa innersuussutigalugu.
Qeqqata Eqqartuussisoqarfiata Nakorsamit eqqartuussivimmut siunnersuisartumik innersuussut malinniarlugu aalajangerpaa.
Eqqartuussivimmi suliap suliarineqarnerata nalaani angutip anaanani ajoqusertariaqarlugu piffissami sivitsortumi takorluugaqartarsimallunilu takorruuisarsimasoq saqqummiunneqarpoq.
- Angutip tarnikkut nappaatilinnut napparsimmavimmi ikiorneqarnissani pisariaqartikkaa qularutissaanngilaq. Nakorsallu eqqartuussivimmut siunnersuisartut angutip assingusumik pinerluuteqaqqissinnaanera aarlerinartoq nalilerpaa, taamaammat eqqartuussiviup nakorsamit innersuussummik malinninnera piffissamillu killiligaanngitsumik inissinneqartussanngortitsinera ilorrisimaarutigaara, Gutti Harryson oqarpoq.
Anaanaasoq 73-inik ukioqalertoq
Angutip eqqartuussut tiguaa.
Angut Danmarkimi tarnikkut nappaatilinnut napparsimmavimmut nuutsinneqannginnermini tigummigallarneqassaaq.
Sisimiuni Politiit arnaq inissiami ilisimanngitsoq pillugu siorna marsip ulluisa sisamaanni nalunaarfigineqarput. Pineqartoq tassaavoq arnaq 73-inik ukiulik, taannalu toqusimasutut nalunarutigineqarpoq.
