Angut kalaaleq Danmarkimi angummik kalaaleqatiminik toqutsisimasutut nassuertoq

Angut 43-nik ukiulik Randersimi Pontoppidansgademi inissiat ilaanni savimmik kapineqarluni decembarimi toqutaavoq.

Tamanna ullumi sisamanngornermi eqqartuussutigineqarpoq, angummi maanna 38-nik ukiulik toqutsisimalluni Randersip eqqartuussiviani nassuerpoq.

Toqutaasoq unnerluutigineqartorlu tamarmik nunatsinneersuusut, Sermitsiaq.AG  allappoq.

Angut kalaaleq 38-nik ukiulik ukiuni arfineq-pingasuni parnaarunneqartussanngorluni eqqartuussaavoq.

Østjyllandip politiivi tusagassiuutinut taama nalunaarput.

- Eqqartuussiviup aalajangernera naammagisimaaqaara, unnerluutigineqartullu naleqquttumik sivisussusilimmik parnaarunneqartussaanini takorloorsinnaanngoraa ajoriinnagassaanngilaq, Østjyllandip politiivisa unnerluussisussaatitaanerat Jakob Beyer oqarpoq.

Imerniartarfimmi naapissimasut

Angut 38-nik ukiulik angullu 43-nik ukiulik Randersimi imerniartarfiit ilaanni Svends Barimi siorna unnuk taanna naapissimasut, Randers Amtsavis allappoq.

Tamatuma kingorna angutip 38-nik ukiullip Pontoppidansgademi inaanukassallutik isumaqatigiipput.

AAMMA ATUARUK Angut 43-nik ukiulik Danmarkimi savimmik kapineqarluni toqutaasoq

Angulli 38-nik ukiulik kingusinnerusukkut qasuummeriarami innarusulersimavoq. Angutilli 43-nik ukiullip angutip taassuma sinililiiveruttortaarnerani eqqissiveqarani akornusersoqattaarsimavaa. Unnerluutigineqartoq eqqartuussivimmi taama nassuiaasimasoq, Randers Amtavis allappoq.

Tassa angutip 38-nik ukiullip toqutsineranik kinguneqartumik angut 43-nik ukiulik savimmik kingorna kapivaa.

Angut 38-nik ukiulik eqqartuussaanerminik eqqartuussisuuneqarfimmut suliareqqitassanngortitsinissamik eqqarsarfissaqarusussimavoq.

Angut taanna toqutsinermik kinguneqartumik savimmik kapisisimasutut aatsaat eqqartuussaanngilaq. Arnamimmi savimmik uummataatigut kapillugu toqutsisimanini pillugu ukiuni arfineq-marlunni parnaarussassanngortinneqarluni 2012-imi eqqartuussaavoq.