Angut Nuummi tigusarineqarpoq: Politiit nakkutiginnissinnaalerput
Nutarterneqarpoq nalunaaqutaq 17.12: Angut tigusarineqarpoq
Politiit Nuummi Atertami sisamanngornermi ualikkut suliaqarnerata kingunerisaanik angut tigusarineqarpoq.
Politiit Nuummi innuttaasumit tarnikkut napparsimasumit imminut aallaanissamik politiinilu sulisunut aallaanissamik siorasaaruteqartumik sianerfigineqarsimallutik tusagassiuutinut nalunaarutigaat.
- Angutip ulorianartorsiortitsisinnaasutut politiinit ilisimaneqarnera pissutigalugu Nuussuarmi Atertap ilarujussua assersorneqarpoq, angutillu inissiamiinnera pissutigalugu politiit immikkut suliaqartartui sulisinneqarput, politiit allapput.
Angut tamatuma kingorna angut inissiamit aallaasilerluni anillappoq, arlaleriarlunilu seqqoriarluni inissiamut uteqqilluni.
Politiit isumaqatigiinniartartuisa arlaleriarlutik oqaloqatigereeraat angut inissiamit sakkoqarani anillappoq, politiillu annilaanganartorsiorfiunngitsumik tigusarinnillutik, pisoqarnerani ikilertoqanngilaq.
Politiit suliaqarnerminnut atatillugu Atertap ilarujussua assersorsimavaat, assersuinerli maanna atorunnaarsinneqarpoq inuillu sumiiffimmi tassani eqqissillutik ingerlaqqissinnaalerlutik.
Suliaq politiinit maanna misissuiffigeqqissaarneqassaaq, suliamilu susoqaqqinnissaa aalajangiiffigineqarumaartoq, politiit naggasiipput.
