Angut politiinut aallaasersornissamik siorasaaruteqarsimasoq iperagaasoq
Angut 36-nik ukiulik politiinut aallaammik siorasaaruteqarnermi kingunerisaanik Nuussuarmi ippassaq unnukkut tigusarineqarpoq, taanna inatsisitigut naliliisoqarnerata kingorna marlunngornermi ualikkut iperagaavoq.
Kalaallit Nunaanni Politiit KNR-imut paasissutissiipput.
Kalaallit Nunaanni Politiit oqarnerat naapertorlugu angutip siorasaaruteqarneri tigummigallarneqarnissaanut inatsit tunngaviusoq naapertorlugu killisiorneqarnissaanut naammanngitsut inatsisitigut naliliinerup inerneraa.
Allatut oqaatigalugu angutip 36-nik ukiullip tigummigallarneqarnissaanut inatsisitigut tunngavissaqanngilaq.
AAMMA ATUARUK Nuuk: 36-nik ukiulik tigusarineqarpoq politiinullu siorasaarisimasutut pasineqarluni
Suliaq 36-nik ukiullip inissiamiittup politiinut aallaammik siorasaaruteqarneranut tunngassuteqarpoq. Politeeqarfiup angut nalunaaqutaq 17.30-p missaata tungaanut eqqissisarniarsarigaluarpaat.
Tamannali iluatsinngimmat 36-nillu ukiulik siorasaarutiminik ilumoorussissaguni inunnut allanut navianartorsiortitsisinnaammat politiit angutip inissiaata nalaani isumannaallisaaniarlutik aallartipput.
Sumiiffinni najugaqartut tamarmik illup iluaniiginnaqquneqarput.
Angutip inissiamit anisinniarnissaa pissutigalugu politiit inissiamut gassinik qulliliornartunik sisamariarlutik seqqorput, nalunaaqutarlu 21:26 angut tigusarineqarlunilu politiinut siorasaaruteqarsimasutut pasineqartoq suliaqarnermi aqutsisup nalunaarutigaa.
