Angut toqungasoq Ilulissani nassaarineqartoq
Angut inuusuttoq 21-nik ukiulik toqungasoq Ilulissani Sermermiut eqqaani pisuinnaat aqqutaani ippassaq nassaarineqarpoq.
Angut toqungasoq inunnit pisuttuaqatigiinnit nassaarineqarsimasoq politiit KNR-mut oqarput. Inuup timaanik siumuisut ikiueqqaarneq atorlugu uumarsaasimagaluarput iluatsinnaguli, taama Kalaallit Nunaani Politiit pigaartut pisortaata Gedion Qvistip oqaatigaa.
Tamannalu pillugu politiit ippassaq nalunaaqutaq ataatsip missaani kalerrinneqarput, ilaqutaasullu kalerrinneqareersimasut aamma erseqqissaatigineqarpoq.
Inuup timaanik toqungasumik siumuineq pinerlinermut attuumassuteqarnersoq qulakkeerniarlugu aqagu ataasinngornermi toqungasut timaanik misissuisartunit misissuisoqassasoq, politiit oqarput.
Sermiligaami 18-nik ukiulik toqutsisimasutut tigusarineqartoq
Tunumi nunaqarfimmi Sermiligaami angut 18-nik ukiulik angummut 42-nik ukiulimmut toqutsisimasutut tigusarineqartoq politiit aamma ilisimatitsissutigaat. maannalu Inatsit tunngaviusoq malillugu killisiorneqarluni.
AAMMA ATUARUK Angut Sermiligaami toqutsisimasutut pasineqarluni tigusarineqartoq
18-nik ukiulik maanna Inatsit tunngaviusoq malillugu killisiorneqarpoq.
Ullunilu 26-ni tigummineqassasoq politiip pigaartup oqaatigaa.
Qaanaami angut ikuallaasoq
Qaanaami angut inuusuttoq inatsit tunngaviusoq malillugu aamma killisiorneqarpoq. Taanna illumik ikuallaasimasutut, nakuusersimasutut, pisortaqarfimmilu sulisumik qunusaarisimasutut pisuutinneqarpoq.
Oqaatigineqarporli illumik ikuallaanermut tunngatillugu inunnnik ajoqusertoqarsimanngitsoq, illuli annertuumik ajoquserneqarsimasoq politiit erseqqissaatigaat.
