Anorersuup ikaat illullu qaliaat marlunngornermi teqqaasikkai
Paamiut, Maniitsoq Nuullu marlunngornermi anoraasuarujussuarput.
Inunnik ajoqusertoqanngitsoq, Kalaallit Nunaanni Politiit paasissutissiipput. Inuilli arlallit aqqusermi angallanneq unimmat biiliminnit nikinneq ajuleqqapput.
- Biilit arlallit nikinneq ajulerput, inuillu ilaat ingerlariaqqissinnaajunnaaqqallutik. Taakku qatserisartunit snescooterit atorlugit angerlaanneqarput. Taama sakkortutigisumik anorersuarnerani tamanna naatsorsuutigineqarsinnaavoq, Kalaallit Nunaanni Politiit pigaartuisa pisortaat, Jørgen Madsen oqarpoq.
Aammattaaq anorersuup sakkortunerpaanerani navianartunik teqqaasoqarnera pissutigalugu inuit isersimaannassasut politiinit kaammattuutigineqarpoq.
Politiit mianersoqqussutertik taanna nalunaaqutaq unnukkut qulingiluanut atorunnaarsippaat, silamilu mianersortumik angallattoqaqqissinnaalernerarlugu.
Anoraasuarujussuarnera
Anoraasuarnera marlunngornermi nalunaaqutaq arfernup missaani sakkortunerpaalerpoq.
Tassanilu anoraasuarnera sekundimut meterinik 42,6-inik sakkortussuseqartutut uuttorneqarpoq, issariarneranilu sekundimut meterit 30,1 missaannik sakkortussuseqarluni.
Nuummi eqqaaveqarfiit ilaasa qaliaat teqqaasut, Maniitsumilu ikaat teqqaasimasut politiinut nalunaarutigineqarput, Paamiuni ajoqusertoqarneranik nalunaaruteqartoqanngilaq.
Timmisartukkut kinguaattoornerit
Nunatta kitaata sineriaani silarlunnerani timmisartukkut angallannermut aamma sunniuteqarpoq. Air Greenlandimmi timmisartuussinissat taamaatsiinnartariaqarsimavai.
- Timmisartukkut angallassineq tamarmi ullormik ataatsimik kinguartinneqarpoq. Timmisartumut ilaasussat ilaat ullumikkut pingasunnngornermi apuuffissaannukaanneqarput, ilaallu aqagu sisamanngornermi angallanneqarumaarlutik, Air Greenlandip attaveqaqatigiinnermut pisortaa, Katja Vahl KNR-imut oqarpoq.
