Aputeqangaatsiarneranik aamma illit ilungersorpit? Nuummi 64 centimeterimik ippassaq apivoq

Nuummi matukkut ullaaq anillakkavit illit aamma aputeqartorujussuusoraajut? Aqqusinikkut ingerlanaveerpit imaluunniit bussinut iluatsitsiffiunngitsumik utaqqigaluarpit?

Tamatumunnga pissutissaqarluarpoq. DMI-p oqarnera naapertorlugu illoqarfiit pingaarnersaanni ippassaq 64 centimeterimit annikinnerunngitsumik apivoq, Nuummi silasiornermik nakkutilliisoq, Andreas Pedersen KNR-imut paasissutissiivoq.

Ualimut 20 centimeterimik aamma apeqqippoq.

Ullut marluk ingerlaneranni 1 meterip missaanik apivoq.

1-imit 10-mut nalinginnaasumit ulluni marlunni qanoq apitigiva?

- 1-imit 10-mut oqaatigissagaanni 8-9-10-p missaanik apineruvoq. Apisorujussuuvoq. Agguaqatigiissillugu februaarip qaammataani 60 centimeterimik nalinginnaasumik apisarpoq, Andreas Pedersen oqarpoq.

Ulussaarsuartut sakkortutigingajattoq

Anori ippassaq nalunaaqutaq 12.50 sakkortunerpaavoq – tassani sekundimut 30 meterinik sakkortussuseqarpoq – tassa ulussaarsuartut sakkortussuseqangajalluni anorersuarpoq. Ulussaarsuartut sakkortussuseqaraangami sekundimut 32 meterinik sakkortussuseqartarpoq.

AAMMA ATUARUK Juulli aputeqarpianngitsoq: Nuup decembarimi kiannerpaaffigisimasani angungajakkaa

Anorip sakkortunera ilutigalugu aput teqqaavoq. Aqquserngit matuneqarput, tamannalu angallannermut ajornartorsiortitsingaatsiarluni. Kommuneqarfik Sermersuup aputaajaasuisa tamanna malugisinnaalluarpaat. Aputaajaasullu suliassanut ullumikkut malinnaasinnaanngillat, anorimmi persertingaatsiarpaa. Taamaammat kommunip pisariaqanngitsumik angallannerit tamarmik pinnginnissaat kaammattuutigaa.

- Biilit aqqusinermi marreqqasut amerlapput, taakkulu aputaajaasoqarnissaanut akornutaapput. Aqqusinermi aputaajaasut aputaajaasinnaanissaat pingaaruteqarpoq, ajornartorsiortoqalertillugu ikiuigasuarnissamut angalasoqarsinnaaniassammat. Neriuppugut kaammattuutigineqartoq innuttasunit paasineqarluarluni, aputaajasut malinnaasinnaanngornissaasa tungaanut malinneqarumaartoq, kommune Facebookimi quppernermini allappoq.

Bussit uniinnartut

Nuup Bussiisa Nuussuup Qinngorpullu akornanni aqquserngit aput pissutigalugu matoqqasut pissutigalugit ullup sinneranut angallassinissatik tamarmik unitsippaat. Anorip aput qaqqamit mittarfiup aqqutaata qeqqanukaartup aqqusineq matuaa.

Ualeq manna amerlanerit ingerlasinnaaleqqissimapput.

Aputeqangaatsiarnera neqitsinertuffeqangaatsiarsimaneranik pissuteqarpoq. Tamannalu sakkortuneruliinnarpoq. 

Ulluni tulliuttuni pitsaaneruleriartussanngitsoq, Nuummi DMI-mit, Andreas Pedersen oqarpoq.

- Piffissaq tulliuttoq qularnartorujussuuvoq, apingaatsiarlunilu anorlertussaavoq, piffissamilu sivikitsuinnarmi silagittassalluni.