Aputeqanngitsumi ukiortaarsiorneq – imatut qummoroortassaatit
Ukiup taama ilinerani nalinginnaasumik Nuuk qaqortuinnaasarpoq. Ukiorli manna taamaanngilaq.
Illoqarfinni arlalinni aamma aputeqanngilaq. Nuummi decembari oqaluttuarisaanermi kiannerpaap tulleraa: decembarip 21-anni 12,6 gradenik kiappoq.
Aput aappoq, nunattalu ilarujussuani qaqutigoortumik juullilernerani qulit sinnerlugit kiattarluni. Maanna issileqqikkaluarpoq - apinanili.
- Nuna manngertorujussuuvoq, qummoroortartullu nunamut inissikkuminaassinnaallutik. Aputissaaleqivugut, Nuummi Qatserisartut ittuat Jens Dahl oqarpoq.
Tamannalu ukiortaarsiornitsinnut sunniuteqassaaq – qummoroortartummi pisarnitsitut apummut manguinnarsinnaanngilagut?
- Taamaammat qummoroortartut puiaasanut mangullugit iluarnerussaaq. Tamannali aamma sissuernartoqarpoq, Jens Dahl oqarpoq.
- Puiaasat ulorianarsinnaapput. Qummoroortartoq takivallaarpat puiaasaq uppissinnaavoq.
Taanna aputeqanngingajavissumi ukiortaarsiornissamut qummoroortartunut igeriussiviliorsimavoq.
- Taanna saviminermik sanaajuvoq, qummoroortartunut mangitsivissanik putoqarluni, qatserisartut ittuat oqarpoq.
Taama ittumik sanasinnaanngikkaanni, piuminarnerusumik periarfissaqarpoq:
- Ruujoritoqqanik qummoroortartunut igeriussiviliortoqarsinnaavoq, Jens Dahl oqarpoq.
- Uanga qisuk putulerlugu sananikuuvunga. Taanna uppissinnaanngilaq.
- Nammineq igeriussiviliortoqarsinnaalluarpoq. Atortussanik nassaarniallaqqinneq apeqqutaaginnassaaq.
Aputeqannginnerata aamma inuit qummoroortartuserusukkunnaarpaat, qummoroortartunik nioqqutillip Gunnar Petersen-ip tamanna malugaa.
- Maani Nuummi aputeqannginnerata nioqquteqarniarnera assut sunnerpaa.
- Ukioq manna qummoroortartut ataatsimoortut arlalikkaat nunamut ileriaannaat piumaneqarnerupput. Qummoroortartut nunamut manguttarissat piumaneqarpianngillat, taanna oqarpoq.
Aqagu unnukkut qummoroortartorusuttunut Jens Dahl pingasunik siunnersuutissaqarpoq:
- Isarussat isumannaarsuutit eqqaamakkit.
- Qummoroortartup kukuttaataa (seersua) qanillinaveersaarlugu talit tasillugu kukuguk. Ikummarpallu qimaguk.
- Qummoroortartoq aallanngitsoortoq orninnaveersaaruk. Qummoroortartoq ingerlaannaq aallanngippat uterfiginiaqinagu. Qaqugukkulluunniit qummoroortartoq qaarsinnaavoq.
