Argentina nunarsuarmi pissartanngortoq
Lionel Messi Argentina peqatigalugu nunarsuarmi pissartatut kiisami imminut taasinnaanngorpoq. Argentinami isikkamik arsaalluni nunarsuarmi Qatarimi pissartanngorniunnermi Frankrigimut finalimi ajugaammat.
Minutsit 90-it unammmisoqareersorlu 2-2-mik naligiittoqarpoq, unamminerlu sivitsorneqarluni. Unamminerup sivitsorneqarnerani tamarmik immikkut ataatsimik isertitsipput, unamminerlu naammassimmat naligiittoqarmat straffeqattaartoqartariaqalerluni.
Argentinap siuttua Lionel Messi marloriarluni isertitsivoq.
Argentina taamaasilluni pingajussaa nunarsuarmi pissartanngorpoq, 1978-imimi 1986-imilu aamma pissartanngormata.
Ajugaasut millionilikkuutaanik pissarsissasut
Isikkamik arsaannermi nunarsuarmi pissartanngoqqammersut Argentina pokalinnannermi saniatigut aningaasarpasssuarnik aamma akissarsitinneqassapput.294 millionit koruunit. Tassa Argentinap isikkamik arsaattartuisa kattuffiata, isikkamik arsattartartut nunat tamalaat kattuffiannit FIFA-mit pissarsiassai, Isikkami arsaannermi nunat tamalaat kattuffiata FIFA-p nittartagaani tamanna atuarneqarsinnaavoq.
Isikkamik arsaattartut aningaasanik qanoq amerlatigisunik pissarsitiginissaat pillugu FIFA malittarisassaqanngilaq.
Nunat ataasiakkaat VM-imut peqataatitami aningaasanik qanoq amerlatigisunik tuniniarneraat namminneq aalajangissavaat, qanorlu aamma agguataarneqassanersut namminneq aalajangertussaallugu.
Nunat VM-imut peqataasut aningaasat pissarsiassaat, kingullermik VM-ertoqarneranut naleqqiullugu 281 millionit koruuninik amerlisimappput, aatsaallu taama amerlatigalutik.
Ruslandimi kingullermik 2018-imi VM-ertoqarmat taamanikkut pissartanngortoq Frankrigi 266 millionit koruuninik akissarsitinneqarpoq.
Finalimi ajorsartoq pokalinnanngikkaluarluni aningaasarpassuarnik aamma pissarsiassaqarpoq, sølvinnattummi 210 millionit koruuninik pissarsissammata.
Aningaasat pineqartut FIFA-p nunarsuarmi pissartanngorniuttoqarneranut atatillugu isertitaaninngaanneerput, soorlu tv-qarfiit aallakaatitsisinnaanissamut piginnaatitsissummik pissarsiniarnermi ilaatigut akiliutaaneersuullutik.
