Arnanit siullersaalluni USA-p nunanut allanut ministererisimasaa Madeleine Albright toquvoq
USA-p oqaluttuarisanerani arnanit siullersaalluni nunanut allanut ministeri Madeleine Albright toquvoq. 84-inik ukioqarpoq.
Pingasunngormat kræfteqarnermi kingunerisaanik toquvoq. Albrightip pisortatigoortumik Twitterikkut nittartagaani ilaqutai nalunaaruteqarput.
Nunanut allanut ministeriusimasoq ilaquttaminit ikinngutiminillu najorneqarluni toqusoq nalunaarummi allanneqarpoq.
- Anaanaq, aanaq, qatanngut, atsat/aja ikinngullu asannittoq annaavarput, nalunaarummi allaqqavoq.
Nunanut allanut ministeri Jeppe Kofod (S) nutaarsiassaq taanna pillugu Twitterimi allappoq toqunera attortissutigisimaqalugu:
- Ilumut isumassarsisitsisuuvoq, maligassiuisoq aamma naalagaaffiit akornanni attaveqarnermik, inuillu oqartussaaqataanerannik aamma inuttut pisinnaatitaaffinnik pimoorussisoq. Atlantikoq ikaarlugu ataatsimoorussilluni pingaartitanut suleqatigiinnermullu ilisarnaataavoq uummaarissoq.
Albright Prag-imit qimaasutut 1948-mi USA-mut pivoq. USA-mi politikkikkut inuunermi pingaaruteqalerpoq politikkikkullu suliaqarnermini tupinnartumik angusaqarluni.
1997-imiit 2001-imut Bill Clinton demokratiusoq præsidentiutillugu. Artnait siullersaalluni taama atorfeqarpoq.
Nunanut allanut ministeriusimasoq killissani tikillugu sulivoq. Toqussi tikillugu ilaatigut Georgetown University-mi professoriuvoq aningaasaateqarfinni ingerlatsiveqarfinnilu arlaqaqisuni silersuinut ilaasortaalluni.
Albright Tjekkoslovakiami Nazitysklandip tiguaanngilaarnerani inunngorpoq. Inunngorami ateqarpoq Maria Jana Korbelova. Angutaa naalagaaffinnut allanut attaveqarnermi atorfeqarpoq, ilaqutariilliu London-imut qimaapput.
Kingsinnerusukklut ilisimatinneqarpoq ilaqutariit juutiusut. Kisianni katuullisut perorsarneqarpoq.
Sorsunnersuaq kingulleq qaangiuteqqammersoq ilaqutariit USA-mut nuupput, taamaannginneranili Schweiz-imi atuarpoq, atinilu Madeleine-mik taarserlugu.
USA-mi Joseph Albright katippaa. 1982-imi avitsinnatik aappariit pingasunik meerartaarput.
