Aron Tasiilami killilersuinermut akerliussutsiminik takutitsivoq – killilersuutillu manna atorunnaarput
- Nuannaaqaanga!
Coronapassi unnuaqeqqaniit atorunnaareersorlu Sofie Berthelsen Qaqortumeersoq taama oqarpoq. Taamalilluni soorlu neriniartarfinnut, imerniartarfinnut, atuagaateqarfinnut pisortalluunniit ingerlatsiviinut allanut isilernermi kapitissimanermut akiuussutissaqalersimanermulluunniit takussutissamik uppernarsaateqarnissaq pisariaarupput.
Taamaattoq qanermut assiaquteqartussaaneq kitaani suli atorallassaaq, kisianni Tasiilami, Ittoqqortoormiini nunaqarfittaanilu coronapassi qanermullu assiaquteqartussaaneq unnuaqeqqaniit atorunnaarput.
Tamannalu Aron Kristiansenip iluarusuutigeqaa. Taanna Taasilap naak tunillaassuuffiunani killilersuiffigineqarneranut sapaatip akunnerani kingullermi akerliussutsiminik takutitsivoq.
Nunatsinni killilersuutit – Naatsumik
Nunatsinni tamarmi tamanit iserfigineqarsinnaasuni coronapas atuutissaaq.
Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit:
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
Imigassamik nioqquteqarneq nunatsinni kommuninit tallimanit sisamani februaarip aallaqqaataanut imaluunniit ulluisa qulingiluaannut inerteqqutaagallarpoq.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit.
Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
- Akuersaarneqarsinnaajunnaaramimi, neriorsorneqarpugummi akiuussutissamik kapuuisoqareerpat ammarneqassassugut, Aron KNR-imut kingullermik sisamanngormat taama oqarpoq.
Massakkullu pissutsit ima ilipput:
- Nuannaaqaanga tamatta immitsinnut pakkutaarsinnaaleqqippugut!
- Fritidsklubbimi, kulturikkut illorsuaritsinni timersortarfinnilu iserfigineqarsinnaaneri killeqartorujussooriarlutik maanna tassa tamanit iserfigineqaqqissinnaaalerput.
Nunap ilarujussuani annertuumik tuniluuttoqarpoq
Tasiilami inuttaasut 90 procentiinit amerlanerit akiuussutissamik aappassaannik kapitinnikuupput. Nunap sinnerani tamarmi aqqanilinnik ukioqalereersimasut 83 procentii akiuussutissamik kapitissimapput.
- Nunatta kangiani akiuussusertinnikut amerlammata killilersuineq taavani atorunnaarpoq, Peqqissutsimut Naalakkersuisumut taartaagallartoq Pele Broberg (Naleraq) tusagassiortunut ippassaq katersortitsinermi taama oqarpoq.
Nunap sinnerani tamarmi oqartussat oqarnerattuut – tuniluunneq suli annertuvoq, kisiannili tuniluunnerup annertussusivia ilisimaneqarani.
Coronarlutik peruluttut kisimik tigusiffigitillutik PCR-imik misissorneqarsinnaapput. Tunillanneqarsimasut allat perulunngitsut peqqissinissartik tikillugu angerlarsimaannassapput – peqqissigunillu peqqissinertik namminneq nalunaarutigisassavaat. Periuseq tamanna atulerpoq misissuisarfiit napparsimmaviillu tunillaassuunnerujussuarmit tatisimaneqarmata.
Taamaalilluni tigusiffiginnilluni misissuisarneq Nunatsinni coronamut akiuiniarermi pingaarnertut sakkujunnaarpoq. Inunnik PCR-imik misissuisoqassaarmat, inuillu napparsimmavinnut nakorsiartarfinnullu iseqqusaajunnaarnerat peqqutigalugu tunillanneqarsimasut qassioqqissaarnerat ilisimaneqanngilaq.
Imigassaq matoqqatinneqarallassaaq
Nunatsinni nakorsaaneq Henrik L. Larsen innersuussivoq killilersuineq qasukkaamisinneqassasoq.
- Sapaatip akunnerini kingullerni marlunni napparsimmavimmi uninngasuutigineqartut qulit 13-illu akornanniiginnapajaarnerat peqqinnissaqarfimmiit aqunneqarsinnaasimavoq. Suliffeqarfiit sulinngitsoortorpassuaarupput inuiaqatigiillu nalinginnaasumik naammaginartumik ingerlaqqilerllutik, naak napparsimallutik angerlarsimasariaqartut suli amerlagaluartut. Taamaattumik naliliisimavugut qasukkaamisitsisoqarsinnaasoq tamannaluvoq killilersuutinik qasukkaanermut ingerlaqqinnissamullu tunngaviusoq, Henrik L. Larsen tusagassiortunik ippassaq katersortitsinermi taama oqarpoq.
Qaqortumi ilinniartup Sara Heinrichip tamanna nuannaarutigaa.
- Ajunngilluinnarpoq, akiuussutissamimmi kapitinnikuunngitsunut iluaqutaassaaq, arlalippassuarnummi iseqqusaaajunnaaraluarneq oqitsuinnaasimassanngimmat.
Kommunini pingasuni imigassaarniarneq matoqqatinneqarpoq. Matusisoqarnissaa kommunit namminneq kissaatigisimasaat – Naalakkersuisunit sapaatip akunnerata matuma siuliani tamanna akuerineqarpoq.
Imigassaq februaarip 9-anni ammaqqissaaq.
