Nuna tamakkerlugu isikkamik arsarluni pissartanngorniunnermi GM-mi assut takulluarsimanerarpoq

Arsaannermi nuna tamakkerlugu Morten Rutkjær maanna Danmarkimut utereernermi Ilulissani GM-rtoqarnerani takusaminik nalilersuivoq arfininngornermilu unnukkut pissanganaqisumik naggasiisoqarpoq.

Unammineq sivitsorneqareersoq straffeqattaartoqareersorlu Nagdlúnguak ajugaavoq GM-llu nalaani unamminerit arlallit straffeqattaarluni ajugaasussarsiffiusarput.

- Pitsaassuseq qaffasippoq arsaattullu unamminernik pikkunartunik tamaviaarfiusunillu takutippaatigut. Pingaartumik semifinalet, finale inissinniunnerillu ilimagisanniit pikkunarnerujussuupput Morten Rutkjær arsaannnermi GM-rtunik siullerpaamik takusoq oqarpoq.

Taktikkimut pikkorissut

2020-mi nuna tamakkerlugu sungiusaasunngorpoq ukiorli 2020 aamma 2021 GM-ertoqanngilaq corona pissutigalugu.

- Unamminerit tamarmik qaffsissumik pitsaassuseqarput. Pingaartumik maluginiarpara arsartut timikkut sungiusarluarsimanerat siusinnerusumut sanilliullugu. Taassuma saniatigut maluginiarpara iligiit arlallit taktik isumaliutigilluartaraat. Tamanna takullugu assorsuaq nuannerpoq takusinnaagakku arsap siumut ingerlanniarnera aammalu illersueriaaseq isumaliutigineqarluartartut. Tamakku pissutaaqataapput iligiit taktikkimut tunngavissaqarluarnerannut, Morten Rutkjær oqarpoq.

AAMMA ATUARUK Arsaannermi GM-mi arsallammanngortoq: Toqqarneqarneq tupaallaatigeqaara

Kalaallit arsaattartut kattuffiat KAK peqatigiiffiit suleqatigalugit siunissami unammersuariaasissamik ilusilersuisussanngorpoq tassaanilu kissaatit pingaarnerit ilagaat aasap arsaaffiusup ingerlanerani unamminerit amerlanerulernissaat.

GM-mi unamminerit amerlanerulernissaat peqatigiiffinni piumassutsimik suli annerusumik sunniissasoq nuna tamakkerlugu sungiusaasoq Morten Rutkjær neriuppoq.

- Tunngaviusumik isumaga tassaaavoq iligiit timikkut sungiusarluarsimasut aammalu isumatusaartumik taktikkiliorsinnaasut aappaat GM-rtoqarnissaat angusarissaarsinnaasut, Morten Rutkjær oqarpoq.

Nunanut allanut unammisartussatut toqqakkat aqagu pingasunngornermi nalunaarutigineqassapput. Iligiit septemberip qaammataani Tyrkiamut sungiusariassapput aammalu Kosovo unammisassaannut ilaalluni.

AAMMA ATUARUK Arsaannermi GM: Semifinale pissanganaqisumik naammassisoq