Arsaattartoq arsarluarnerpaatut toqqagaasoq: Torsuusami sungiusartarpoq

Arnat Ilulissani illup iluani unammersuarnerat sapaatip-akunnerata siuliani ingerlanneqarput, arsaattut ilaat immikkut takutitsilluaqisoq maluginiagassaavoq.

Arnaq anginngitsunnguaq isikkamik arsaannermi pissartanngorniuttoqarnerani arsamik ingerlatsinermigut pikkorilluinnartoq isiginnaartunik immikkut maluginiarneqarluarpoq. 25-nik ukiulik Inger Thomassen Aappilattumeersoq, arsallammattut iligiittullu immikkut toqqarneqarpoq.

Inger Thomassen aatsaat aappassaaneerluni illup iluani pissartanngorniunnermi arsaqataavoq. Nammineerlunili qimmini atorlugit angerlarsimaffimminiluunniit sungiusartarpoq.

- Uangaalluni tupannarpoq. Atera taaneqarmat sajuppunga. Arsaattartut taama amerlatigisut uanga toqqarneqarnissara ilimaginikuunngikkaluarpara, sungiusarpiarnikuunnginnama.

- Ingerlaannavik Upernaviliarsinnaannginnama sungiusaqataallunga, nunaqarfitsinni tasikumiarlunga qimmilerlunga sikumi arpattarpunga, tikikkaangamalu uagutsinni aamma nukkassartarlunga.

Inger Thomassen ukiup arsallammaattut ukiup iligiivattullu toqqagaammat timersortarfimmi isiginnaartut ersaattaateqaat. Aajuna filmiliaq Facebookimi siammarterneqarluartoq ataani takusinnaavat.

Aappilattut nunaqarfinnguuvoq 149-t missaannik inoqartoq. Nunaqarfik timersortarfeqanngilaq taamaammallu Inger Thomassen sungiusarfissaqannginnami, nammineq nassaassarsiorluni sungiusartarpoq.

Taanna timersoqatigiinni UB-83-ini unammeqataassullumi immikkut toqqagaavoq.

Aalisartoq piniartorlu

Arsarneq taassuma sunngiffimmini soqutigisariinnarpaa. Taannami ulluinnarni aalisartuullunilu piniartuuvoq. Taanna 25-nik qimmeqarpoq, ukiukkut atorluartakkaminik.

Ataasiaannaranilu Aappilattumiit Upernavimmut kisimiilluni aamma qimussertarpoq. Aappilattoq Upernaviup avannaq kangisissortaani 20 kilometerisut isortartutigisumiippoq.

Angallateqarpoq aamma taanna aasakkut aamma inuuniutigisarpaa.

UB-83-imi sungiusaasup arsartuni arsarluarnerpaatut toqqagaanera tulluusimaarutigeqaa.

- Siullermik oqaatigerusuppara taama ittumik arsartuuteqarluni assut tulluusimaarnaqaaq. Marloriaannarluni klubitsinni sungiusarnikuugaluarluni klubitsinnut sunniuteqangaatsiarpoq pitsaasumik, Peter Karlsen oqarpoq.

- Oqartariaqarpunga Ingeritut ittut inuit avannaani takussaavallaanngillat, Inger immikkut piginnaasalittut isigisariaqarpoq.

Taamatullumi arsarnerup tungaatigut ineriartuinnassaguni nunanut allanut unammisartunngornissani angusinnaagaa sungiusaasoq naliliivoq.

Tamannalumi Inger Thomassenimut pilerilersitsivoq.

- Nunanut allanut unammisartunngorsinnaaneq angorusuppara, angussagukkulu ammaffigalugu.