Assammik arsarnermi unammineq pissanganartoq angusaqarusussuseqalersitsisoq
Nunatsinni assammik arsarnermi inersimasut Nuummi Inussivimmi sapaatip akunnerani matumani pissartanngorniunneranni ajugaangaatsiartoqartarlunilu pissanganartumik unammisoqartarpoq.
Unammisaqattaarnerit marlunngornermi aallartinneqarput, unamminerillu maajip ulluisa arfineq-pingajuanni sapaammi naammassineqarnissaanut katillugit 20-t ingerlanneqassallutik.
Arnani klubbinit sisamanit peqataasoqarpoq, angutinilu tallimanik peqataasoqarluni.
Assamik arsarnermi nunatsinni pissartanngorniunneq
Inersimasut nunatsinni assammik pissartanngorniunnerat Inussivimmi 2022-mi maajip pingajuannit arfineq-pingajuannut ingerlanneqarpoq.
GSS-ip Assammik arsartartui Timersoqatigiiffiit Assammik Arsartartut Kattuffiat TAAK suleqatigalugu aaqqissuuppaat.
Nunatsinni inersimasut assammik arsarnermi 1974-imiilli pissartanngorniuttarnerannit manna 48-ssaanik pissartanngorniuttoqarpoq.
Nunatsinni Inersimasut pissartanngorniunnerat ataasiaannarluni aaqqissuunneqanngitsoornikuuvoq. Tamanna 2020-mi corona pillugu killilersuinerit pissutigalugit aaqqissuunneqanngilaq.
Inussivimmi unamminerit 20-t ingerlanneqareerpata maajip ulluisa arfineq-pingajuanni sapaammi pissartanngortoqassaaq.
Unamminerit tamarmik KNR-TV-kkut aallakaatinneqarput.
Ilulissanit Nagdlunguup Maniitsumiillu Aqissiap sisamanngornermi unnukkut unamminerat pingaartumik pissanngassutaalluarpoq.
Unamminerup immikkoortuani siullermi holdinut tamanut aappaluttuliisoqarpoq, Aqissiarlu tamatuma kingorna isertitsiniarnermi ajornartorsiornerulerluni.
Aqissiarli sukataarluariarami unikkallarnissamut 17-14-imik siuarsimalerpoq.
Unamminerup naammassinissaanut pissannganaannavissoq
Aqissiaq unamminerup immikkoortuata aappaani minutsit 18-it siulliit siuarsimaannavikkaluarpoq. Nagdlunguarli angummalluni 25-25-eqqalerput, tamatumalu kingorna siuarsimanerminnik paarlaattalerput.
Unamminermi minutsit marluinnanngortut Nagdlunguak siarsimalerpoq, naallu unamminerup naammassinissaanut Aqissiaq isertitsigaluartoq, unammineq Ilulissaneersut 33-32-mik ajugaanerannik inerneqarpoq.
Nagdlunguak unamminermi maanna siuttut aappaatut inissisimalerpoq Aqissiarlu pingajuulluni.
Nuummeersut GSS siuttutut inissisimapput.
Arnani NÛK siuttuuvoq.
NÛK Qaqortumeersunut K-33-mut sisamanngornermi unamminerminni immikkoortumi siullermi immikkoortullu aappaata aallartinneranni naligiikannerput. NÛK-li siuarpoq, unamminerlu 23-31-mik naammassineqarluni.
NÛK-mit angutit sisamanngornermi aamma unammilluarput. Taakku Qaqortumeersunut unamminerminni ajugaalluarput.
Unammisaqattaarnerit ullumi tallimanngornermi pingasunik unammisoqarneranik nanginneqassaaq. Siulliit nalunaaqutaq 17.00 aallartissapput.
Assammik arsarnermi inersimasut pissartanngorniunnerannut pilersaarut tamaat uani takusinnaavat.
