Assit: Jonas Vingegaardip Tour De Francemi ajugaanini ilaquttanilu nalliussigaa

Jonas Vingegaard Parisimi ippassaq sapaammi ajugaavoq, tamannalu Hollandip Parisimi aallartitaqarfiani pissusissamisoortumik nalliuttorsiutigineqarpoq.

Jonas Vingegaard danskerpassuarnit Champs-Élyséesimut orniguttunit nersorneqarmat, Kunngissaq Frederik najuuppoq.

- Danskini timersortartuni immaqa aatsaat taama takutitsilluartoqartigaaq. Kisimiilluni sapaatit akunnerini pingasuni akiuuppoq, ullullu ilaanni tamaviaartaqaluni, kunngissq Frederik oqarpoq.

Jonas Vingegaardip timersornikkut takutitsilluarnermi saniatigut qanoq inutsialaatiginini aamma takutikkaa, kunngissaq isumaqarpoq.

Assi © : Scanpix

Kunngissaq Frederik ministeriunerlu Mette Frederiksen Jonas Vingegaardip Parisimi nalliuttorsiutigineqarneranut ornigukkiartortut. Assi: Scanpix

- Unammisaminut ikinngutinnerpoq. Inutsialaaqaaq, aamma Danmarki sikkilertartullu sinnerlugit takutitsilluaqaaq.

Jonas Vingegaard ippassaq nalliuttorsiutigineqarmat, ministeriuneq Mette Frederiksen najuuppoq ajugaasullu ilaqutai soorunami aamma peqataallutik.

Jonas Vingegaard Tour de Francemi ippassaq sapaammi ajugaanini pillugu ulluni tulliuttuni nalliuttorsiutigineqartassaaq.
Hollandimi holdeqatiminit Jumbo-Vismasimit aqagu marlunngornermi nalliuttorsiutigineqassaaq, tamatuma kingornalu Danmarkimi aqaguagu pingasunngornermi aamma nalliuttorsiutigineqassalluni.

Ajugaanera ippassaq sapaammi soorunami aamma nalliussineqarpoq. Tamanna ilaatigut Hollandip Parisimi aallartitaqarfiani pivoq. Vingegaardip ilaquttanilu qaninnerit, aappanilu Trine sakiusanilu Rosa Kildahl, Rosa fra Bagedystenitut ilisimaarineqartoq, peqataapput.

Assi © : Scanpix

Jonas Vingegaardip aappaa, Trine Marie Hansen, Rosa Kildahlip panigaa. Ajugaasup aappaatalu paniat Frida qasulersimarpasittoq assimi takuneqarsinnaavoq. Assi: Scanpix

Jonas Vingegaard Danmarkimut pingasunngorpat tikippat siullermik Københavns Rådhusimi Tivolimilu nalliuttorsiutigineqassaaq.
25-inik ukiulik Jonas Vingegaard tamatuma kingorna angerlarluni Jyllandip qeqqani kitaanilu Glyngøremukassaaq. 

Taanna tamaani sisamanngorpat siullermik ingerlaaqatigiinnertalimmik kingornalu timersortarfissuarmi festernertalimmik nalliuttorsiutigineqassasoq, danskit aviisisa ilaat Skive Folkeblad allappoq. Inuit 10.000 missaat alakkaassangatinneqarput.

Nalliuttorsiutigineqaqattaareeruni sapaatit akunnerata tulliata tungaanut qasuersissalluni, Jonas Vingegaard oqarpoq.

Assi © : Scanpix