Assit: Qeqertarsuarmi ilisimatusarnermut atatillugu misissuisarfimmut iseqataagitsi
Misissuisarfiit ullutsinnut naleqqukkunnaarsimapput, siniffiillu ikippallaarput aamma toqqorsivinniittut atortorissaarutit tamarmik allanut immannguaannaq inissaqartitsileqqapput.
Aqutsisup issittumi silap pissusianik misissuisarfik Qeqertarsuarmiittoq pillugu taama nassuiaavoq.
Misissuisarfik 2006-imi ukiunik 100-nngortorsiorpoq. Taanna tamatuma kingorna allilerneqarlunilu nutarterneqarpoq, kisianni aserfallatsaaliorneqangaatsiartariaqarluni.
Issittumi misissuisarfik 1905-imiinngikkuni 1906-imi. Assi: Ilisimaneqanngilaq
- Nuannaartorujussuuvugut. Issittoq silap pissusianik ilisimatusarnermi qitiulluinnarpoq. Ukiuni marlunni nutarsaaniarluta suliaqangaatsiarnikuuvugut, ilisimatusartullu ilisimatusarnermut atatillugu misissuisarfimmik nutaaliarluinnarmik neqeroorfigisinnaalernerat nuannerpoq, Morten Rasch oqarpoq.
Igittakkat kuutsittaganngortinneqartut
Siniffiit amerlassusaat 26-nit 39-nut amerlineqarput, misissuiffinnik nutaanik nutaalianillu sanasoqarpoq aamma ilisimatusartut atortorissaarutinik sermersiortut atortagaannik nutaalianik ukiumiit ukiumut uninngatitsiviginnaasaannik toqqorsiveqalersoq, aqutsisup oqaatigaa.
AAMMA ATUARUK Qeqertaq nutaaq nunatta avannarpiaani nassaarineqartoq
Misissuisarfinni perusuersartarfinni nuannarineqarpallaanngitsut igittakkat kuutsittakkanik taarserneqarnerat tikittartut aamma qilanaartuutigisinnaavaat.
Issittumi pinngortitami ataqatigiinni allanngoriartornerit
Issittumi ilisimatusarnissamut soqutiginnittoqaleraluttuinnarnerani Issittumi Misissuisarfimmut tikittartut piffissami sivisuumi amerliartuinnavissimapput – aamma ukiukkut.
- Nunarsuup kissatsikkiartornera Issittumi nunarsuup sinneranut sanilliullugu sisamariaammik sukkaneruvoq, taamaammat Kalaallit Nunaanni Danmarkimit, Nunanit avannarlernit, Kalaallit Nunaanni aamma ilisimatusarfissuarnit USA-mit, Tysklandimit Japanimiillu ilisimatusarnissamut soqutiginninneq tikinniartut imaaginnapajaalersimapput. Taakku soorunami atortorissaarutinik nutaaliaanerusunik pisariaqartitsipput, Morten Rasch oqarpoq.
Taassuma oqarnera naapertorlugu ilisimatusartut ilinniartullu nunarsuarmit tamarmeersut 100-t ilisimatusarnermut atatillugu misissuisarfimmukarnissaminnut maanna utaqqipput.
Ilisimatusartut misissuisarfimmi issittumi pinngortitami ataqatigiinnerni qeriunnaartullu masarsuani allannguutinik uuttortaasarput.
- Suliarineqarnerata nalaani siullermik Covid-19 unammillernartoqartitsivoq, kingusinnerusukkullu imaata sikua siorna upernaakkut ukiorpassuarni matusimanngitsoq Qeqertarsuup Tunuani matuilluni angalasoqarsinnaajunnaarsippaa. Sanaartornermut atortorissaarutit assartornerat taamaalilluni naatsorsuutigineqanngitsumik unikkallarpoq.
