Ataatsimiititaliap 2,3 milliardit koruunit suli isummerfiginngikkai

- Suli isummerfiginngilarput, Inatsisartuni aningaasaqanermut akileraartarnermullu ataatsimiititaliap siulittaasua, Siumumeersoq, Hans Peter Poulsen, KNR-mut taama oqarpoq.

AAMMA ATUARUK Inissiat iluarsartuunnissaannut akiligassaq 2,3 milliardit koruuninngortoq

Ineqarnermut naalakkersuisup, Erik Jensenip, Namminersorlutik Oqartussat nuna tamakkerlugu inissiaataasa attartortakkat, 6000-it missaanniittut, nutarternissaannut aningaasat amigaataasut 2,3 milliardit koruuniusut sapaatit akunnerisa siulianni oqaatigaa.

Naalagaaffik inissialiortiternermut 1987 tikillugu akisussaasuuvoq. Inissiallu maanna iluarsartuunneqartariaqavissortut ilaat 1960-kkunni 1970-kkunnilu sanaartorneqarput.

Siulittaasoq: Qanoq aningaasalersussava?

Naalakkersuisup naalagaaffik akiligassap akilerniarnerani akileeqataassasoq kissaatigaa.

- Massakkut toqqaannaq taanna akisinnaanngilara isuma kusanartuunersoq. Apeqqutaalluinnarpoq qanoq isumaqatigiissusiornissaq iluseqassanersoq. Tamakkuninnga ilisimasaqartigata toqqaannartumik isummerfigisinnaanngilarput, ataatsimiititaliap siulittaasua oqarpoq.

AAMMA ATUARUK Inissiat iluarsartuunnissaannut akiligassaq ullormut 500.000 koruuninik qaffattartoq

Taassuma Naalagaaffik akileeqataassappat aningaasalersuinissat qanoq agguataarneqarnissaat takoqqaarusuppaa. Taannalu Naalakkersuisumit, siunnersuuteqartussamit suli ataatsimiititaliamut apuunneqarsimanngilaq.

6000-ni 217-it ajunngitsut

Akiligassaq taanna ullormut 500.000 koruuninik allisarpoq, suliarilertorneqanngikkunillu alliartuinnassalluni.

Namminersorlutik Oqartussat inissiaataanni 6000-it missaanniittuni, 217-nnaat ajunngitsut suliarineqartariaqanngitsullu 2016-mi nalunaarusiarineqarpoq. Taakkua sinneri nutartigassatut ingutsigassatulluunniit nalilerneqarput.

Iluarsartuussinissamut kinguaattoorutit 2016-mi 1,5 milliadit koruuniupput. 2019-milu 1,7 milliardit koruuniullutik.

KNR-p danskit aningaasaqarnermut ministereqarfiat, ineqarnermut naalakkersuisup kissaataa pillugu attaveqarfigaa.

Ministereqarfiup aningaasanut ministerip, Nicolai Wammenip (S) oqaaseqartinnissaa periarfissaanngitsoq sisamanngornermi akissutigaa.

Soorli oqaaseqarsinnaanginnersoq ministereqarfiup itisilinngilaa.