Atuagaq nutaaq nunatta pinngortitaanik ilitsersuut
- Atuagaq tamanut tulluarpoq. Tassa Kalaallit Nunaanni pinngortitamut soqutiginnittunut, uumasunut naasunullu paasisaqarnerorusuttunut, silallu pissusaata allanngoriartornerata sunniutaanut.
Bo Normander, atuakkamik saqqummersitseqqammertoq oqarpoq. Taanna avatangiisit pillugit siunnersortaavoq.
- Kalaallit Nunaata pinngortitaanut ilitsersuummik kingullermik ukiut 20-t sinnelugit qaangiupput saqqummertoqarmalli, tamatumalu kingorna inuiaqatigiit iluini pinngortitamullu tunngassuteqartuni ineriartortoqarsimaqaaq, ilitsersuummillu saqqummertoqarnissaa pisariaqarsimaqaaq, Bo Normander oqarpoq.
Bo Normander Ilulissat avannaani Eqimi.
Foto: Vibeke Skousen
Taanna aamma oqarpoq, inuit 200-nit amerlanerusut atuakkiornermi ikiuuttut.
Taakkua tassaapput inuit illoqarfinni nunaqarfinnilu najugallit, sumiiffimminni pinngortitamut ilisimasaminnik ingerlatitseqqiisut. Taakku oqaluttuaat, ilisimatusarnermilu paasisat kingulliit ataqatigiissinneqarput.
Ilaatigut soorlu ilisimatuut Pinngortitaleriffimmeersut issittumi pinngortitamut tunngasunik ilisimasarpassuarminnik ingerlatitseqqiipput, aammalu Oqaasileriffik atuakkamut allanneqartunik uumasut, naasut pupiillu aqqinik 550-nik ikiuulluni.
Ilitsersuut pinngortitamut nassarneqarsinnaasoq
Atuagaq "Naturguide Grønland" atuakkanut reolimi kusassaataannaassanngilaq.
Bo Normander neriuppoq, nunatsinni najugalinnit, takornarianit allaniillu, Kalaallit Nunaata pinngortitaanut asannissuseqartunut atuagaq nassarlugu angalaartoqartarumaartoq.
- Kikkunnit tamanit atuarneqarsinnaasunngorlugu allagaavoq. Atuagaq Kalaallit Nunaanni uumasut, timmissat naasut allarpassuillu pillugit paasissutissarpassuarnik imaqarpoq. Aammalu angalanermut tunngasunik imaqarluni taamaalilluni Kalaallit Nunaata sineriaani angalassagaanni qanoq misigisaqartoqarsinnaaneranik tikkuussisumik.
Bo Normander pinngortitaq pillugu ilisimatuujuvoq siunnersortaallunilu, pinngortitarlu pillugu ilisimasaqaqaluni. Marloriarluni Ilulissani najugaqarsimavoq, taamaalillunilu nunatta pinngortitaa timikkut tarnikkullu ilisimallualersimallugu.
Asseq Bo Normanderip assilisaraa, atuakkap suliarinerani tunup avannaarsuani Jameson Landimiinnermini.
Taanna nunarput pillugu ilsimasaqarlualersimagaluarluni atuakkap saqqummersinniarnerani immikkut illuinnartumik misigisaqarsimavoq.
- Tunup avannaarsua Jameson Land tikippara, tamatuma nalaa immikkut illuinnartuuvoq qaqqaami sillisissiaapput assullu moriillutillu sungaartorasaartuullutik. Tamanna umimmannit najorneqartarpoq tamaanimi ivikkanik nerisassaqarluartuugamik.
Ilulissani Kangiata illorsuani aqagu nal. 17-19-mut atuakkap saqqummeqqaarnera pillugu persuarsiutigineqassaaq.
Atuagaq danskisuinnaq allagaavoq, kalaallisulli nutserneqarnissaanut maanna aningaasassarsiuunneqarluni.
