Avannaata Qimussersuanut peqataasussaq: Qimmeqarnermi tapersersorneqarneq iluaqutaasorujussuusarpoq

Qimussit 30-t 40 kilometerisut isorartutigisoq Avannaata Qimussersuani Qasigiannguani arfininngorpat pisussami ingerlaarfigisussaavaat. – Nuannerunartorujussuuvoq, Frederik Mathiassen oqarpoq.

Allattoq Jens Rafaelsen, Else Olsvig

marsip 26-at 2022 11:02

Frederik Mathiassen Ilulissaneersooq arfinilinnik ukioqarluni qimussertalersimasoq sooq sukkaniuuttalersimanersoq aperineqarami oqaluttuarpoq ataatsimoorluni unammiuaarnermik nuannarinninnermik unammerusussuseqarnermillu aallaaveqartoq.

- Inooriaasaavoq. Ikinngutit, kammalaatit naapeqqinneri nuannersorujuupput takoqqillugit.

Sukkanerit akornannut inissittarpoq

Frederik Mathiassen Avannaata Qimussersuanut 2018-mi peqataaqqaarnermini nr. 4-ngorpoq, 2019-mi nr. 1-nngorluni, 2021-milu Avannaata Qimussersui-nut (Qaanaamiit Tunumiillu peqataasoqarnerani) peqataangami nr. 2-tut inissilluni. Ukioq manna sisamassaa peqataasussanngorpoq.

Qimmit inuutissarsiutaapput

Frederik Mathiassenip qimmini aalisarnermik inuutissarsiuteqarnermini atungarai, oqaatingaalu qimmeqassangaanni qimmeq nuannarilluartariaqartoq.

Avannaata Qimussersua 1989-imi aallarnerneqarpoq ukiut tamaasa kitaamiuinnarnit, Sisimiuniit Upernavimmut, peqataaffigineqartartoq.

Avannaata Qimussersui 2021-mi ingerlanneqaqqaarpoq, Kalaallit Nunaat tamakkerlugu qimussertartunit peqataaffigineqartoq – Qaanaamiit, Tunumiit kitaamiuniillu.

Avannaata Qimussersui ukiut pingasukkaarlugit pisartussatut aallartinneqarpoq, tassunga angalanerup akisunera peqqutaatinneqarpoq.

- Qimmeqarniaraanni qamuuna piumassuseq pingisariaqarpoq, qimmeq pisarialissuungami ukioq kaajallallugu ullut tamaasa. Ikiorteqarpunga qaningilluinnakkannik, taakkualu qimmeqarninnut oqilisaaqataasorujussuusarput, Frederik Mathiassen nassuiaavoq nangillunilu:

- Tapersersorneqarneq iluaqutaasorujussuusarpoq nuannequtaalluni, Frederik Mathiassen nassuiaavoq.

Qimmit ulloq unnuarlu nakkutigineqartut

Sukkaniuunnissami peqataasussat 30-t maannakkut Qasigiannguanut piffissaq eqqorlugu apuussimalerput, sinneruttulli pingasut Qeqertarsuarmeersut angallannermi ajornartoorneq peqqutingalugu piffissaq eqqorlugu tikissinnaajunnarlutik.

Tallimanngormalli peqataasussat qimmii Avannaata Qimussersuata nal. 12.00 aallartinnissaata tungaanut ulloq unnuarlu nakkutigineqarput.

Avannaata Qimussersua KNR-TV-kkut nalunaaqutaq 11.30 malinnaaffigisinnaavat.

Nutaarsiassami kukkunermik nassaarsimaguit uunga allaffigineqarsinnaavugut.