Beirutimi karrinut quersuit tusaamanerlugaasut isasoortut

Libanonimi illoqarfiit pingaarnersaata Beirutip umiarsualiaviani karrinut quersuit marluk ippassaq sapaammi isasoorput.

Isasoornerisalu kingorna Beirutimiut pujorsuarmit isikkiveerupput.

Beirutip umiarsualiaviani aatsaat ajutoortoqalinngilaq, ukiummi marluk matuma siorna umiarsualivimmi tassani qaartoorujussuartoqarpoq.

Taamanilu qaartoortoqarmat illoqarfiup ilarujussua aseruatiterpoq, inuit 200-t ajunaarput 6.500-llu ikiligaallutik.

AAMMA ATUARUK Beirutimi umiarsualivik ikuallarujussuartoq

Beirutip umiarsualiaviani karrinut quersuit marluk isasoornerannut ikuallannerup qaammatini arlalinni aamaarujoorsimanera peqqutaasoq, nutaarsiassaqartitsivik Ritzau allappoq.

Karrinut quersuit allat marluk aamma isasuunngujoortut, Libanonimi pisortat suliffeqarfii pillugit ministeri Ali Hameh quersuit marluk isasooreersullu oqarpoq.

Beirutip umiarsualiviani ukiut marluk matuma siornagut qaartoornersuaq nunalerinermi naatitanut naggorissaatissiamik, nalunngikkaluarlugu qaartoorsinnaasoq, 2013-imili umiarsualivimmiititsinermik peqquteqarsimavoq.