Biden rakettinik ungasianiit igeriuttakkanik Ukrainemut nassiusserusunngitsoq

Ukraine russit sakkutuuinut akisilluni saassussissutissaminik rakettinik ungasianiit igeriuttakkanik nasseqquvoq. USA-li nassiusserusunngilaq.

Allattoq Ritzau

maajip 31-at 2022 12:30

Nutserisoq Karline Platou

Qaartartunik ungasianiit igeriuttakkanik russit eqqorneqaatigisinnaasaannik USA Ukrainemut pilersuinavianngitsoq, USA-p præsidentiata Joe Bidenip ippassaq ataasinngornermi oqaatigaa.

Ukrainemiut naalakkersuisuisa oqaatigigaluarpaat, sakkutuutik russit sakkuinut unammillersinnaasunik ungasianiillu igeriunneqarsinnaasunik nukingertumik pisariaqartitsisut.

- Russinut eqquisinnaasunik sakkunik ungasianiit igeriuttakkanik Ukrainemut nassiussinavianngilagut, Biden oqarpoq.

Ukrainemiut naalakkersuisuisa USA rakettinik 300 kilometerinik ungasissusilimmiit tulleriisungarlugit igeriaqattaartartunik nassiusseqqugaluarpaat.

AAMMA ATUARUK USA og dets allierede holder videotopmøde om Ukraine

Sakkunik igeriuttakkanik taama ittunik Ukrainemiut pissarsigaluarunik Ruslandimut igeriarsinnaapput nunalu annertoorujussuaq sequmillugu. Tamannalu siunertaanngilaq, Biden oqarpoq.

Ukrainemiut præsidentiata Volodymyr Zelenskyjp siunnersortaata ilaat qanittukkut tweetimut ima allappoq: ”70 kilometerinik ungasissusilimmiit igeriarfigiteqattaarluta saassutaaritittuarnerput akioruminaaqaaq, uagullu taamak sakkunik pisinnaasaqartigisunik peqanngilagut”.

USA sakkutuunik ikiuiartortunik milliarder dollarinik arlalinnik naleqartunik siusinnerusukkut Ukrainemut nassitsinikuuvoq.

Nutaarsiassami kukkunermik nassaarsimaguit uunga allaffigineqarsinnaavugut.