Borgmesteri: Imigassaarniartoqaannarpat tuniluunneq unikaallatsikkuminaappoq
Coronavirusip tuniluutilertornera pakkersimaaniarlugu imigassaarniarneq Qeqqata Kommuniani matuneqarpoq.
Naalakkersuisut imerniartarfiit januaarip 25-ata tungaanut unnukkut quliniit ullaassakkut tallimat tungaanut matoqqassasut ataasinngormat aalajangerpaat.
Coronavirusip tuniluutipilunnerata unikaallannissaa siunertarineqarpoq.
Imerniartarfinnik matoqqaqqusinerup angerlarsimaffinni ernguttoqartarnissaanik kinguneqarnissaa Qeqqata Kommuniani kommunalbestyrelsip aarleqqutigaa.
Nunatsinni coronamik tunillatsissimasut aatsaat taama amerlatigisut
Tunillatsissimasut ullup kingulliup ingerlanerani paasineqartut nutaat 457-iupput.
Taakku tunillatsissimasunit ippassaq paasineqartunit 524-unit 67-inik ikinnerupput.
Tunillatsissimasut ataatsimut qanoq amerlatigineri saqqummiunneqartarunnaarput.
Tamanna misissuinermi periutsip allanngorneranik pissuteqarpoq. Tunillatsissimasorpassuaqarnera pissutigalugu misissuisarfiit malinnaasinnaajunnaaqqapput. Taamaammat kikkut tamarmik PCR-imik misissorneqarsinnaajunnaarput.
Maannakkut utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. Aamma inuit angerlarsimaffimminni sukkasuumik misissuutinit tunillatsissimasutut takussutisserneqartut.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
- Erngunnerit, ingammik weekendini, angerlarsimaffinnut nuunneqarnissaat illuni anginngitsuni inuit ataatsimoorlutik festilissappata tuniluunnerup suli siaruaateqqinnissaa ernumagigatsigu, borgmesteri Malik Berthelsen (S) oqarpoq.
AAMMA ATUARUK Qeqqata Kommuniani imigassanik aalakoornartortalinnik tuniniaasarnerit inerteqqutaagallalersut
Taamaammat Qeqqata Kommuniani imigassaarniarsinnaaneq matuneqassasoq Naalakkersuisunut qinnutigaa.
- Taamaattumik killilersuutaasinnaasut inuunermi pingaaruteqanngitsut, soorlu imigassaq eqqarsaatigalugu, tamakku ilaatigut sakkugisariaqarigut isumaqarpunga. Taamaaliornikkut neriuutigaarput tuniluunnerup killilersimaarsinnaanissaa.
Meeqqat eqqugaasinnaasut
Coronavirusip tuniluutipiloornera aqunneqarsinnaajunnaaraluttuinnassappat suliffeqarfinnut maannamit ajornerusumik sunniuteqarnerlunnerulernissaa Malik Berthelsenip aarleqqutigaa.
Kommuunimi maanna tunillanneqarsimasut 500-t missaanniipput. Maniitsumi, Kangerlussuarmi Sisimiunilu tunillanneqarsimasut ullut tamaasa maanna amerleriaqqittarput. Tassalu nunarput tamakkerlugu coronavirusi tuniluuttorujussuuvoq.
Coronavirusip tuniluuterujussuarneranit eqqugaasut sulisinnaannginnerat inuiaqatigiinnut akisusoq borgmesteri eqqaasitsivoq.
- Inuppassuit tunillatsissimanertik pissutigalugu ulluni makkunani sulisinnaanngitsorpassuit, suliffeqarfiit sulisuminnik amigaateqarnerujussuat inuiaqatigiinnut qanoq akisutiginerat eqqarsaatigisariaqarigut isumaqarpunga.
Angerlarsimaffimmimi ernguttoqalissappat eqqissiviilliortoqalersinnaanera taassuma ernummatigaa.
- Taassumalu saniatigut angerlarsimaffinni eqqissiviilliornerit peratarsinnaaneri meeqqanut eqquinerlunnissaat ilanngullugu tamakkua ernumagigatsigit, Malik Berthelsen oqarpoq.
