Borgmesteri: Inuit cpr-normutik siammarterneqarsimasinnaanissaat ernummatigisariaqanngilaat
Kommune Kujalleq qarasaasiatigut qaammatip massuma siuliani saassunneqarpoq.
Tamatuma kingunerisaanik inuit pillugit paasissutissat mianernartut soorlu cpr-normut aningaasaqarnermullu tunngasut siammarterneqarsimasinnaasut, Kommune Kujalleq sapaatit akunnerata massuma siuliani nalunaarpoq.
AAMMA ATUARUK Kommune Kujallermi qarasaasiatigut saassussineq: Inunnut paasissutissat ingerlateqqinneqarsimasinnaasut
Inuit cpr-normui qarasaasiatigut pinerliiniartartunit pissarsiarineqarsimasinnaasut, Kommune Kujalliup borgmesteria Stine Egede KNR-imut uppernarsaavoq.
Kommune Kujallermi innuttaasunit makku tamatigut eqqumaffigineqarnissaat kommunimit kaammattuutigineqarpoq:
- Mailinik, allakkanik, akiligassanik ilimaginngisanik nassitsisunit ilisarisimanngisanit nassiussarsisoqarsimanersoq.
- Nammineq qarasaasiatigut isumannaallisaaneq eqqumaffigilluarneqassasoq. Assersuutigalugu qarasaasiakkut isumannaallisaaneq pillugu aningaaserivinniit kaammattuutit misissoqquneqarput.
- Qarasaasiakkut niuerniarniaraani MIT ID atorneqassasoq.
- Isissutissat (password) akuttunngitsumik allanngortinneqartassasut.
- Paasineqarpoq, kommunitsinni paasissutissat ilai immaqa personnormutallit tillinneqarsimasut, taanna oqarpoq.
Immikkut ilisimasalik assortoraa
Qarasaasiatigulli saassussinerup qanoq kinguneqartigissanersoq ilisimanngikkaluarlugu inuit ernumassutissaqanngitsut, Stine Egede isumaqarpoq.
- Maannakkut sulineq tassunga tunngasoq suli ingerlavoq, aamma paasissutissat ersarissut suli piginngilagut. Taamaammat oqaatigisinnaangilara qanoq annertutiginersoq, kisiat ernumassutissartaqanngillat. Imannak paasillugu taakua pinerlunniartartut imminnik silarsuaraat taanna kisimiillutik, Stine Egede oqarpoq.
Inuilli normuisa qarasaasiatigut pinerliiniartartunit pissarsiarineqarsimasinnaanerat aarlerinartoq, Digitalimik Sullissinermut Aqutsisoqarfiata pisortaata Katrine Hjelholt Nathanielsenip siusinnerusukkut oqaatigaa.
- Royal Greenland qarasaasiatigut 2021-mi decembarimi saassunneqarami attaveqaataanut ullorpaalunni akornusiivoq. Tamanna ilaatigut sulisut tamakkiisuunngitsumik aningaasarsinerannik kinguneqarpoq
- Namminersorlutik Oqartussat qarasaasiatigut marsimi saassunneqarami nunatsinni kommunit arlallit attaveqaataannut akornusiillunilu Inatsisartut upernaakkut ataatsimiinnerisa unikkallarneranik kinguneqarpoq
- Peqqinnissaqarfiup attaveqaatai maajip aallartisimalaarnerani akornuserneqarujussuarput. Tamanna qarasaasiatigut saassunneqarsimaneranik peqquteqartoq, saassunneqarneraniit ullualuit kingorna paasineqarpoq.
- Kommune Kujalleq qarasaasiatigut oktobarimi saassunneqarami ilaatigut innuttaasut pisartagaannik tunniussisinnaajunnaarpoq.
- Inuup normua kinaassutsimik uppernarsaataavoq allanut ingerlateqqinneqaqqusaanngitsoq. Taanna kikkunnilluunniit takuneqarsinnaalersimappat aarlerinarpoq, Katrine Hjelholt Nathanielsen oqarpoq nangillunilu:
- Paasissutissat ingerlateqqinneqarsimasinnaasut mianernartuusimappata, tamanna inuisa eqqorneqaatigisinnaavaat. Aningaasanillu peqquserluutigineqarsinnaappata, inuisa aningaasanik annaasaqaatigisinnaavaat.
Qarasaasiatigut isumannaallisaaneruniartoq
Kommune Kujalleq qarasaasiaatigut saassuunneqarmat innuttaasunut sullissiviata innuttaasut saaffiginnissutaannik ikiuiniarnera kommunimi attaveqaatit aaqqinnissaasa tungaannut aamma kipiluttunarsivoq.
AAMMA ATUARUK Kommune Kujallermi qarasaasiat nalinginnaasumik ingerlaqqilerput
Attaveqaatilli aaqqikannereeraluartut, qarasaasiatigut suli isumannaallisaanerulinngilaq.
- Qularnanngilluinnarpoq qarasaasiatigut uagut annertuumik inerisaasariaqarpugut isumannaallisaanerput eqqarsaatigalugu, Stine Egede oqarpoq.
Kommunili attaveqaatitigut ajornartorsiutiminik aaqqinnissaminut qujanartumik aningaasartuuteqarujussuartariaqanngilaq.
- Tamatumunnga aningaasartuutissavut qujanartumik millionilikkaajunngillat. Qanorli akeqassanersoq naluarput. Sulisut suliani kingusinnaarussinerat taakkunanilu angummanniaqqinnissaat akisuunaarnerpaavarput.
Attaveqaaterpassuit katitigarujussuummata isummaallisarnerunissaat akisusinnaasaraluarpoq.
Kommune Kujallermut qarasaasiakkut saassussinermut suliaq politiit suli paasiniaaffigaat.
