Borgmesteri: Kitaani nunamik allanngutsaaliiniarneq pilisartunik illersuineruvoq
Kommuni Qeqertallip Qeqqata Kommuniatalu borgmesteriisa, Ane Hansenip Malik Berthelsenillu, Kangerlussuarmit avannammut Ikamiut kujataatungaa tikillugu nunarujussuaq allanngutsaalerusuppaat.
Taakkua nuna allanngutsaalineqassagaluarpat piniariartartut ikinnerusunik pisassinneqartarnissaat siunertarinngikkaat, Kommuni Qeqertalimmi borgmesteri oqarpoq.
- Eqalunniarfiuppat, umimmanniarfiuppat imaluunniit tuttunniarfiuppat taakkua attorniarneqanngillat aamma ingerlaannassapput, Ane Hansen KNR-mut oqarpoq.
Takornariat aqukkusukkaat
Nunalli isorartuup allanngutsaalerusunnera allamik siunertaqarpoq. Nunatta avataanit takornariat ilisimatusartullu nakkutigineqaratik ullumi tamaaniissinnaapput.
AAMMA ATUARUK Kitaani nunamik eqqissisimatitamik pilersitsisoqarnialersoq
Ilulissani Nuummilu mittarfissuit atulerpata takornariat pisukkusuttut amerlinissaat borgmesterit naatsorsuutigaat. Taamaattumik nuna tamanna nunaqavissut piliffigisarmassuk pilisartut takornarianut ilisimatusartunullu illersorusuppaat.
- Takornariat qinnuteqaqqaarlutik nunamut eqqissisimatitamut isersinnaalernissaat tamatumalu aqutamik ingerlanissaa siunertaavoq, Ane Hansen oqarpoq.
Namminneq aalajangersinnaanngikkaat
Tassa imaappoq, assersuutigalugu ilaqutariit nunaqavissut, Nassuttuup Qinnguani tuttunik, Naternamiluunniit umimmannik pilisartut siunissami pilisuaannarnissaat qulakkeerniarneqarpoq.
- Piniarfiit piniarfitoqqallu pisarnermittut atorneqarnermisullu ingerlaannassapput, Ane Hansen oqarpoq.
Kommunit taakku marluk borgmesteriisa pisassat ikilerusunngikkaluaraat, pisassat amerlassusaasa nikinnginnissaat maanna qulakkeerneqarsinnaanngilaq.
Kommunimmi pisassiissutinik aalajangersaasartuunngillat. Naalakkersuisummi ukiumut qanoq pisaqartoqartigissaneranik aalajangiisartuupput.
Nuna allanngutsaalineqarusuttoq assimi ataaniittumi tungujuartumik qalipaateqarpoq:
