Canadap meeqqat angajoqqaaminnit pinngitsaaliissummit peersitaasimasut milliardinik taarsiissuteqarfiginiarai

Canadami meeqqat ilaquttaminnit peerneqarlutik kristumiut najugaqarfigiitigalugit atuarfiinut ukiuni qulikkuutaani amerlasuuni pinngitsaalisaassummik inissinneqartarsimapput.

Canadami nunap inoqqaavisa meerartaat 1800-kkunnili 1996 ilanngullugu ilaquttaminnit peerneqarlutik Canadami oqartussanit najugaqarfigiitigalugu atuarfinnut inissinneqartarsimapput.

Meeqqat kristumiut atuarfiinut inissinneqartarsimapput, meeqqat franskisut tuluttullu ilinniartinneqarlutillu kristumiunngortinneqartarsimallutik.

Ilaquttat eqqorneqarsimasut Canadami naalakkersuisuinit milliardilikkuutaanik maanna taarsiivigineqalerput, tassa Canadamiut ooriinik 40 milliardit dollarinik, imaluunniit 200 milliardit koruunit sinnerlugit taarsiiviginiarneqalerlutik.

BBC taama allaaserisaqarpoq.

Meeqqat 150.000-t missaat najugaqarfigiitigalugu atuarfinnut, Canadami naalakkersuisuinit, ilagiillu katuullinit aqunneqartunit, inissinneqartarsimapput.

Meeqqat kinguaassiutitigut atornerlunneqartarsimasut, iluamillu neritinneqaratillu persuttarneqartarsimasut, misissuinerup annertuup 2015-imi takutippaa.

Meeqqat aningaasanik naammanngitsunik taarsiivigineqarsimasut, Canadami eqqartuussiviup 2016-imi aalajangerpaa, meeqqammi eqqorneqarsimasut tamarmik immikkut 200.000 koruuninik taamanikkut taarsiivigineqarmata.

Eqqartuussiviup aalajangiinera Canadami naalakkersuisut suliareqqitassanngortinniaraluarpaat, Canadamili naalakkersuisut innuttaasunit, pingaartumik nunap inoqqaavinit, kimigiiserfigineqareerlutik taarsiinissamik maanna akuersipput.

Tamanna pillugu siornatigut pisimasut eqqarsaatigalugit maanna tassa 200 milliardit koruunit sinnerlugit taarsiisoqarnialerpoq.

Aningaasat amerlassusaat sumiginnaanerup annertussusaanik takutitsisut, Canadami First Nationsit siuttuata RoseAnne Archibaldip oqaatigaa:

- Aningaasat naapertuilluartumik naammassinnittoqarneranik takutitsinngillat, ilorraalli tungaanut ingerlasoqarneranik takutitsillutik, taanna oqarpoq, nangillunilu:

- Aningaasat meeqqat qanoq amerlatigisut sumiginnagaasimanerannut takutitsipput, meeqqat ilaquttaminnit inuiaqatigiinniillu peerneqarsimanerannut takutitsillutik, RoseAnne Archibald oqarpoq.

Najugaqarfigiitigalugit atuarfiit 70 procentiisa missaat ilagiit katuullinit aqunneqarput. Paavip Canada tikeraarniaraa BBC-p allaaseraa, naallu Canadami innuttaasut akornanni amerlasuut utoqqatsertoqarnissaanik piumasaqaraluartut paavi suli utoqqatsernikuunngilaq.