Canadami inuit qulit savilersortoqarnerani toqutaasut

Canadami nunap immikkoortuani Saskatchewanimi nunaqarfiit ilaanni ippassaq sapaammi unnuakkut savilersortoqarnerani ikinnerpaamik inuit qulit toqutaasut allallu 15-it ikiligaasut, nutaarsiassaqartitsivik CNN allappoq.

Saskathewanimi naggueqatigiit James Smith Cree Nationimi 3400-t missaannik inulimmi nunaqarfimmi Weldonimi 200-t missaannaannik inulimmi sumiiffinni assigiinngitsuni 13-ini saviliorsortoqarsimasoq politiinut ippassaq sapaammi ullaaralaakkut kalerriutigineqartoq, Canadami politiit tusagassiortunik katersortitsigamik oqaluttuaraat.

- Pisoq ajortorujussuuvoq ukiorpassuarnilu aatsaat taama sakkortutigisumik pisoqarpoq, Saskatchewanimi politikommissæri Rhonda Blackmore oqarpoq.

AAMMA ATUARUK Canadami aallaasersortoqarnerani inuit toqutaasut amerleqqittut

Inuit ikinnerpaamik qulit inuunerannik naleqartumik savilersorsimasutut pasineqartut maannalu ujaarineqartut angutit marluk 30-nik 31-nillu ukiullit aqqi taaneqarput tassaallutillu Damien Sanderson aamma Myles Sanderson. Taakkua biilerlutik qimaasimasut Weldonimiit 300 kilometerinik kujasinnerusumi takuneqarsimasutut nalunaarutigineqarsimapput.

Saskatchewanimi toqutaasut ikiligaasullu aqqi suli saqqummiunneqanngillat. Canadami naalakkersuisut siulittaasuat, Justin Trudeau, eqqugaasut ilaqutaannut misiginneqatiginnilluni Twitterimi allappoq pisoq alianartoq amiilaarnaqisorlu assut uummaalliornartoq.