Charlotte Ludvigsen Nuummi Kofoeds Skolemi pisortanngortoq
Kommuneqarfik Sermersuumi borgmesteriusimasoq, Charlotte Ludvigsen Nuummi Kofoeds Skolemi pisortanngussaaq.
Taanna atorfimmi februaarip aallaqqaataani sulilissaaq.
Kofoeds Skole tusagassiuutinut taama nalunaaruteqarpoq.
Kofoeds Skole
Kofoeds Skole Nuuk 2016-imi suliniutit aallartippoq.
Kofoed Skole ullumikkut Kommuneqarfik Sermersuumit ingerlatsinermut isumaqatigiissuteqarfiusumik imminut pigaluni ingerlanneqarpoq.
Innuttaasut ukiumut 200-init amerlanerusut Kofoeds Skole Nuummiittarput.
- Charlotte Ludvigsen Kofoeds Skole Nuummi suliumammat nuannaarutigeqaara. Nuummi innuttaasut pisariaqartitsisut pillugit suliat siuarsaaqataaffigissavai, taamaalillunilu Kommuneqarfik Sermersuumi misilittakkani atorlugit siuarsaaqataasinnaassaaq, siulersuisunut siulittaasoq, Malik Hegelund Olsen oqarpoq.
Borgmesteritut tunuartoq
Charlotte Ludvigsen 35-nik ukioqarpoq. Taanna allannguisutut imminut taasinnaavoq, tamannalu pissutigalugu aamma atorfittaassaminut qilanaarpoq:
- Inuiaqatigiinni pisariaqartitsisut ataqqineqarlutik inuunissaat pingaartitarilluinnagaraara. Kofoeds Skole pitsaanerusumik inuuneqarnissamut tunngaviliisuuvoq. Ilisimasakka misilittakkakkalu atorlugit tassani allanngueqataarusuppunga, taanna tusagassiuutinut nalunaarummi oqarpoq.
AAMMA ATUARUK Charlotte Ludvigsen suliat ajorluinnartut pissutigalugit borgmesteritut tunuartoq
Charlotte Ludvigsen Inuit Ataqatigiit sinnerlugit Kommuneqarfik Sermersuumi ukiuni pingasuni siorna juunip 15-iata tungaanut borgmesteriuvoq.
Taassuma suliat ajorluinnartut arlallit kommunillu ineqarnermut susassaqarfianik aqutsineq isornartorsiorneqarnerata kingunerisaanik tunuarnissani nammineq aalajangerpaa.
Suliat marluk 2020-meersut aningaasanik attartornermut pisinermullu isumaqatigiissutinut tamarmik immikkut 20 millionit koruuninik aningaasartaqartunut tunngapput. Suliat taakku marluk kommunimi politikkikkut oqaluuserineqarsimannginnerat ajornartorsiutaavoq. Tassami kommunalbestyrelsimit akuerineqarsimanngillat – imaluunniit itigartitsissutigineqarsimanngillat.
Nalunaarusiaq isornartorsiuisoq
Suliami allami kommunip ineqarnermut susassaqarfimmik aqutsinerani ajornartorsiutit annertuut kukkunersiuisut nalunaarusiaanni allaaserineqarpoq.
Aalborg Universitetimi aningaasaqarnermik aqutsinermi professori, Per Nikolaj Bukh nalunaarusiamik aatsaat taama ilungersunartigisumik isornartorsiutigisumillu takusimanngisaannarluni oqarpoq.
Charlotte Ludvigsen 2019-imi juunimi Asii Chemnitz Narup paarlallugu borgmesterinngorpoq.
Charlotte Ludvigsen Kommuneqarfik Sermersuumi IA-mit kommunalbestyrelsimut suli ilaasortaavoq.
